Ukraina Mudafaa nazirliginiñ sözcüsi Maksım Prauta, Rusiye prezidenti Vladimir Putinniñ Kyivge Qırımdan Ukrainağa ait arbiy tehnikasınıñ qatarıla bilecegi aqqında beyanatı asılında «saylavdan evelki informatsion kampaniyadır», dep tüşüne. Bunı o, yanvarniñ 12-sinde «Nastoyaşçeye vremâ» telekanalı içün izaat bergende söyledi.
Prauta: «Onıñ (kampaniyanıñ – QA) maqsadı, öz saylavcıları ve halqara toplulıq arasında onıñ (Vladimir Putinniñ – QA) imidjini eyileştirmek. Al-azırda seslendirilgen malümatqa, bu kampaniyanıñ argumentlerinden birine olaraq qıymet kesmek mümkün. Bunıñle beraber, Rusiye Federatsiyası halqara mahkemelerde özüniñ qanunsız areketleri içün cevap berecektir, çünki, bilgenimiz kibi, Ukraina, qanunsız olaraq ilhaq etilgen Qırım territoriyasında qalğan mal-mülküniñ kompensatsiyası boyunca munasip davalar ile halqara mahkemelerge muracaat etti», – dedi.
Ondan ğayrı o, Vladimir Putinniñ tehnikanı alıp bermek aqqında teklifine Ukraina razı olacaqmı ya da yoqmı – bunı Ukrainanıñ yuqarı arbiy-siyasiy rehberleri çezecek, dep qayd etti.
Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini bildirgen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
