Link açıqlığı

Saatnıñ esas haberi

Groysman Putinniñ teklifi aqqında: arbiy tehnikanı Qırımnen beraber qabul etmege azırmız


Volodımır Groysman

Ukraina Baş naziri Volodımır Groysman, Rusiye prezidenti Vladimir Putinniñ, Ukrainağa ilhaq etilgen Qırımda qalğan arbiy tehnikasını qaytarmaq mümkün olğanı aqqında beyanatını izalap, Ukrainağa flot ile birlikte yarımadanı da qaytarmaqnı teklif etti.

Groysman: «Rusiye prezidentine qarşı teklif – flotnen beraber Qırımnı qaytarmağa teklif etem. Eñ yaqın vaqıtta qabul etmege azırmız», – dedi.

Ukraina Mudafaa nazirliginiñ sözcüsi Maksım Prauta, Rusiye prezidenti Vladimir Putinniñ Kyivge Qırımdan Ukrainağa ait arbiy tehnikasınıñ qatarıla bilecegi aqqında beyanatı asılında «saylavdan evelki informatsion kampaniyadır», dep tüşüne.

Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.

Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.

2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG