Link açıqlığı

Saatnıñ esas haberi

Heraşçenko: Qırımnı ve onıñnen beraber Ukrainanıñ bütün mal-mülküni qaytarırmız


Ukraina Yuqarı Radası sözcüsiniñ birinci muavini İrına Heraşçenko, Ukraina akimiyeti ilhaq etilgen Qırımnı ve onıñnen beraber yarımadadaki bütün Ukrainanıñ mal-mülküni «qaytaracaq», dep saya. Bunı o, tünevin Facebookta Rusiye prezidenti Vladimir Putinniñ Kyivge Qırımdan Ukrainanıñ tehnikasını qaytarmaq teklifini izalağanda yazdı.

Heraşçenko: «Qırımnı, qarşısına gemiler alıp, satmaymız, teslim etmeymiz ve deñiştirmeymiz. Ebet, bu Putin tarafından hırsızlanğan bizim gemilerimizdir. Olar, bütün Qırım kibi, işğalciler tarafından harap alğa ketirildi. Rus dünyasınıñ qolu bir şeyge toqunsa, o şey bozula», – dep yazdı.

Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.

Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.

2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG