Link açıqlığı

Saatnıñ esas haberi

Çubarov Putinniñ teklifi aqqında: Rusiye Qırımnı qaytaracaq ve onı ilhaq etkeni içün kompensatsiya töleycek


Qırımtatar Milliy Meclisi reisi Refat Çubarov, Rusiye Ukrainağa Qırımnı qaytaracaq ve onı ilhaq etkeni içün kompensatsiya töleycek, dep tüşüne. Bunı o, tünevin, Rusiye prezidenti Vladimir Putinniñ Kyivge, onıñ arbiy tehnikasınıñ yarımadadan alıp berilmesi aqqında tekifini izalap, Facebookta yazdı.

Çubarov: «Alçaq qalbi ile işlegen cinayetler içün halqara mahkemenıñ ve adaletli cezanıñ qaçınılmaz olğanını duyğan aydut şimdilik Ukrainanı aşalamaq ımtıluvlarını toqtatıp olamay… Eñ soñuda ise Rusiye akmiyeti Qırımnı qaytarmaqnen birlikte Qırımnıñ muvaqqat işğali neticesinde ketirgen qocaman zararları içün kompensatsiya töleycek…», – dep cevap berdi.

Daa soñra Meclis reisi, «Putinniñ aşalayıcı çıqıntılarına sümüklerini aqıtıp başlağanğanlarnı, özüni dünya masharası etmemege» davet etti.

Çubarov: «Sadece şunı biliñiz, dayanır ve er şeyni – Qırımnı, Donbassnı – qaytarırmız, vatandaşlarnı azat etermiz!», – dep ilâve etti.

Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.

Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.

2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG