Link açıqlığı

Mahkeme «Veciye Kaşka işi» figurantlarına tevqif muddetiniñ uzatılması boyunca muracaatnı baqacaq


«Veciye Kaşka işi» figurantlarınıñ yaqalanuvı. 2017 senesi noyabr 23 künü

Aqmescitniñ Kyiv rayonı mahkemesi tergevniñ sıñırlav tedbiriniñ uzatılması aqqında muracaatı boyunca oturışuvnıñ yanvar 12 cuma künü ötkerilmesini planlaştırdı. Bunı Qırım.Aqiqatqa advokat Ayder Azamatov bildirdi.

Advokat: «Adet üzre tedbirni uzatmaq qararı alına, tedbirniñ deñiştirilmesine dair daa iç bir qarar alınmadı. İmayemiz altında bulunğan eki şahısnıñ da sağlığı pek ağır vaziyette; baqayıq, oturışuv nasıl keçer; işte anda olarnen laf etmege çaremiz olur», – dedi.

2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.

Bekir Degermencide sürekli astma bar. Tahqiqat izolâtorında sağlığınıñ vaziyeti birden fenalaştı. Dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında faaliyetçige «acele yardım» çağırıldı. Dekabrniñ 14-ne keçer gecesinde o, reanimatsiyağa oğradı. Ondan soñ onı pulmonologiya bölüginiñ koridorında tuttılar. 2018 senesi yanvarniñ 2-nde faaliyetçini tekrar tahqiqat izolâtorına yolladılar.

65 yaşlı qırımtatar faaliyetçisi Asan Çapuh tahqiqat izolâtorında mikroinsult keçirdi ve acele surette hastahanege yatqızılmasına muhtac edi. Yılbaş tatilleriniñ arfesinde o, tıbbiy teşkerüvden keçirildi, lâkin advokatına onıñ diagnozı ve sağlığınıñ vaziyeti ale daa belli degil.

Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.

XS
SM
MD
LG