Qırımda tevqif etilgen qırımtatar faaliyetçisi Bekir Degermencini ale daa pulmonologiya bölügine keçirmediler. O ale daa bölükniñ koridorında buluna.Bunı dekabrniñ 29-nda Qırım.Aqiqatqa Bekir Degermenciniñ zevcesi Aliye söyledi.
Aliye, aqayı bulunğan pulmonologiya bölügini er kün ziyaret ete, amma aqayınen körüşmege ya da oña bir şeyler ketirip bermege çaresi yoq, çünki aqayını saqçılar qaravullay ve berilecek şeylerni oña yalıñız muvaqqat izolâtorğa teslim etip iriştirmek mümkün.
Aliye: «Hastahanede onıñ sağlığını er taraflama teşkerdiler. Yanvarniñ 2-sine qadar o, pulmonologiya bölüginde qalacaq, yanvarniñ 2-sinden soñ kene tolu kölemde taliller yapılacaq. Sağlığı eyilişe, lâkin o ale daa zayıf. Oña turmağa izin berdiler, amma o, ayaq üstünde çoq turıp olamay», – dedi.
Dekabrniñ 20-sinde Aliye Degermenci, aqayınıñ reanimatsiyadan keçirilgenini ve pulmonologiya bölügi rıqma-rıq tolu olğanı içün bu bölükniñ koridorında yerleştirilgenini söyledi.
Qırımtatar milliy areketiniñ faaliyetçisi Bekir Degermenci noyabrniñ 23-nde diger qırımtatar faaliyetçileri ile beraber, aqsız yerde para talap etüvde qabaatlanıp, tevqif etildi.
Bekir Degermencide sürekli astma bar. Muvaqqat izolâtorda sağlığınıñ vaziyeti birden yamanlaştı. Dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında faaliyetçige «acele yardım» çağırıldı. Dekabrniñ 14-ne keçer gecesinde o, reanimatsiyağa tüşti.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
