2015 senesinde Kyivge kelgen soñ ilhaq etilgen Qırımnıñ sabıq Rusiyege tabi sağlıq saqlav naziri Pötr Mihalçevskiy «CitiDoctor» şahsiy hastahanesinde baş ekim vazifesinde çalışa edi. Bunı Mihalçevskiy özü Herson şeer mahkemesiniñ oturışuvı vaqtında söyledi.
Qırım.Aqiqat, bu muessiseniñ keçken yılda Ukraina Sağlıq saqlav nazirliginden litsenziya alıp, çalışmağa başlağanını tayin etti. Sabıq nazirniñ ömür arqadaşı Oksana Mihalçevskaya Kyivniñ şahsiy hastahanelerinden birinde ultrases diagnostikası ekimi olıp çalışa.
Yanvarniñ başında Ukraina Telükesizlik hizmetiniñ hadimleri Qırımnıñ sabıq Rusiyege tabi sağlıq saqlav naziri Pötr Mihalçevskiyniñ Kyivde bulunğanını tayin ettiler.
Qırımnıñ sabıq baş ekimi yanvarniñ 5-nde Ukraina Cinaiy kodeksiniñ 111-nci maddesi (devletke hainlik) boyunca cinayet işlegeninde töhmetni imzaladı. Herson şeer mahkemesi Mihalçevskiyni bir ayğa tevqif etti. Böylelikle o, fevralniñ 5-ne qadar apiste bulunacaq.
Sabıq nazir özü qanunğa qarşı bir şey yapmağanını ve 2014 senesindeki «referendum»da iştirak etmegenini iddia ete.
2014 senesi iyünniñ 10-nda Qırımnıñ Rusiyege tabi sağlıq saqlav naziri Pötr Mihalçevskiy öz istegi ile istifa etüv aqqında ariza yazdı. Qırımnıñ Rusiyege tabi yolbaşçısı Sergey Aksönov, Mihalçevskiyni «madde boyunca» işten boşamamaq içün istifa etmege mecbur etkenini iddia ete edi.
Qırımnıñ sabıq Rusiyege tabi sağlıq saqlav naziri Pötr Mihalçevskiyniñ tevqif etilmesi aqqında daa tafsilâtlı surette Qırım.Aqiqat saytındaki materialda oquñız.
