Qırımnıñ sabıq Rusiye sağlıq saqlav naziri Pötr Mihalçevskiyniñ işi boyunca mahkemede yanvar 8-de QMC prokuraturasınıñ vekilleri onıñ 60 künge tevqif etilmek kerekliginde israr eteler. Bunı Qırım.Aqiqat muhbiri bildire.
Prokuraturanıñ vekilleri tarafından berilgen malümatqa köre, Mihalçevskiyniñ Qırımdaki Rusiye akimiyetinde çalışması, Ukrainanıñ torpraq bütünligine qarşı doğrultılğan faaliyettir. Ayrıca, prokuratura tarafından taqdim etilgen şaatlarnıñ ifadelerinde, Mihalçevskiy Qırımnıñ Rusiyege qoşuluvı boyunca «referendum»nıñ teşkil etilmesine qol tuttı, dep iddia etile.
Pötr Mihalçevskiyniñ advokatları, qorçalavları altında bulunğan şahıs apis etilmemeli, çünki o, qaçmaq niyetinde degil ve, aksine, mahkeme vastasınen itibarını qaytarmaq ve Ukrainağa zarar ketirmegenini isbatlamaq istey, dep iddia eteler.
Pötr Mihalçevskiy ise jurnalistlerge, özüni er angi qanun bozuluvında qabaatlı saymağanını söyledi.
Al-azırda akem Yaroslav Musulevskiy qarar çıqarmaq içün keñeşüv odasına çıqtı.
Mihalçevskiy yanvar 5-te Ukraina Cinaiy kodeksiniñ 111-nci maddesi (devletke hainlik) boyunca cinayet işlegeninde töhmetni imzaladı. Maddeniñ sanktsiyası, 15 yılğace muddetke azatlıqtan marum etüv şeklinde cezalavnı közde tuta.
Mihalçevskiy özü şimdilik Ukraina telükesizlik hizmeti ve prokuraturasınıñ bildirüvlerini izalamay.
Yanvarniñ başında Ukraina Telükesizlik hizmetiniñ hadimleri Qırımnıñ sabıq Rusiyege tabi sağlıq saqlav naziri Pötr Mihalçevskiyniñ Kyivde bulunması faktını tayin ettiler.
2014 senesi iyün 10-da Qırımnıñ Rusiyege tabi sağlıq saqlav naziri Pötr Mihalçevskiy öz istegi ile istifa etüv aqqında ariza yazdı. Qırımnıñ Rusiyege tabi yolbaşçısı Sergey Aksönov, Mihalçevskiyni «madde boyunca» işten boşamamaq içün istifa etmege mecbur etkenini söyledi.
