Yanvar 8-de saba Hersonda, Ukrainada devletke hainlik yaptı deye şübhe altında tutulğan sabıq Qırım sağlıq saqlav naziri Pötr Mihalçevskiyge sıñırlav tedbiriniñ tayin etilmesi boyunca mahkeme oturışuvı yapıla. Bunı Qırım.Aqiqatqa QMC prokuraturasınıñ matbuat hizmetinde bildirdiler.
Muessiseniñ matbuat hizmetinde Qırım.Aqiqatqa tasdiqladılarına köre, oturışuv, mahkemeden evelki tahqiqat organınıñ bulunğan yeri boyunca ötkerile. Al-azırda akem keñeş odasına ketti.
Mihalçevskiy yanvar 5-te Ukraina Cinaiy kodeksiniñ 111-nci maddesi (devletke hainlik) boyunca cinayet işlegeninde töhmetni imzaladı. Maddeniñ sanktsiyası, 15 yılğace muddetke azatlıqtan marum etüv şeklinde cezalavnı közde tuta.
Mihalçevskiy özü şimdilik Ukraina telükesizlik hizmeti ve prokuraturasınıñ bildirüvlerini izalamay.
Yanvarniñ başında Ukraina Telükesizlik hizmetiniñ hadimleri Qırımnıñ sabıq Rusiyege tabi sağlıq saqlav naziri Pötr Mihalçevskiyniñ Kyivde bulunması faktını tayin ettiler.
2014 senesi iyün 10-da Qırımnıñ Rusiyege tabi sağlıq saqlav naziri Pötr Mihalçevskiy öz istegi ile istifa etüv aqqında ariza yazdı. Qırımnıñ Rusiyege tabi yolbaşçısı Sergey Aksönov, Mihalçevskiyni «madde boyunca» işten boşamamaq içün istifa etmege mecbur etkenini söyledi.
