Ukrain faaliyetçisi Volodımır Baluh açlıqnı toqtatmay, sağlığı ise ağır alda qalmaqta. Bunıñ aqqında qırımtatar Milliy Meclisniñ reis muavini Ahtem Çiygöz Qırım.Aqiqatqa haber etti.
“Onıñ alı yahşıca olmadı. O evelkisi kibi ağır”, - dey Çiygöz.
Daa evel, Ahtem Çiygöz Volodımır Baluh bütün dünyadan sıq-sıq qoltutuv ve alğışlav mektüplerini alğanını Qırım.Aqiqatqa habet etti.
Kremlniñ nezareti altında olğan Aqşeyh (Razdolnoye) rayon mahkemesi ukrain faaliyetçisi Volodımır Baluhnı 5 yılğa umumiy rejimli koloniyağa ve 10 biñ ruble (qararnen 4 biñ hrivna) cöremege mahküm etti.
Baluh soñ sözünde cinayet işiniñ siyasiy sebebi olğanını qayd etti.
Baluh 2018 senesi martnıñ 19-ına başlağan açlıqnı devam etmekte.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ imayesi ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler
