Link açıqlığı

Saatnıñ esas haberi

Advokat – Baluh aqqında: «Açlıqnı muqaytlıqnen qullanmaq kerek, mabüs sağ qalmaq kerek»


Advokat Edem Semedlâyev, Qırım.Aqiqat içün bergen izaatta, ukrain faaliyetçisi Volodımır Baluh «açlıqnı muqaytlıqnen qullanmaq» kerek, çünki apis etilüv yerlerinde açlıq – pek telükeli bir narazılıq çeşitidir, dedi.

Semedlâyev: «Açlıqnı muqaytlıqnen qullanmaq kerek, neticede insan sağ ve sağlam qalmaq kerek. Volodımır Baluh endi pek çoq vaqıttan berli açlıq tuta. Hatırlayım ki, (Rusiyede mahküm etilgen Qırım sakini – QA) Ruslan Zeytullayev açlıq ilân etkende, bilgenimiz kibi SSCB vaqtında apishanede açlıq tutqan (Ukraina halq deputatı, qırımtatarlarnıñ lideri – QA) Mustafa Cemilev onı bundan vazgeçire edi. Umüt etem ki, Baluh içün de, onı, ömürini saqlamaq kerek olğanında qandıracaq insanlar tapılır», – dep añlattı.

Onıñ aytqanına köre, mabüsler açlıqnı soñki çare olaraq qullanalar.

Advokat: «Ğayet telükeli olğan bu adımnı, yalıñız qanunsızlıqqa qarşı başqa imkânlar qalmağanda saylaysıñ. Bunuñ kibi de bu, eşitilmek, dünya toplulığınıñ diqqatını çekmek teşebbüsidir. Kene de Ruslan Zeytullayvniñ açlığı misalinde –o, işniñ ketişatını deñiştirmedi, lâkin Ruslan, böyle etip, bütün dünyağa öz işini bildirdi», – dep ilâve etti.

Baluh, Aqmescit tahqiqat izolâtorında mart 19-da ilân etken muddetsiz açlıqnı tutmağa devam ete.

İlhaq etilgen Qırımda mahkeme Baluhnı, arbiy yedekler saqlağanında qabaatlı tanıp, 3 yıl ve 5 ay muddetine koloniya-qasabada azatlıqtan marum etilmesi ve ondan ğayrı 10 000 ruble (qararnen 4600 hrivna) miqdarında cöreme tölemesine dair uküm çıqardı.

Faaliyetçige qarşı ekinci cinaiy iş Aqşeyh (Razdolnoye) qasabasındaki muvaqqat tutuluv izolâtorınıñ rehberi Valeriy Tkaçenkonıñ arizası esasında açıldı. O, Baluh onı kötekledi, dep iddia ete. Aynı zamanda faaliyetçi ve onıñ imayesi, Tkaçenko özü oña ucüm etkenini bildireler.

Mart 19-da Kremlniñ kontroli altında olğan Aqşeyh rayon mahkemesi Volodımır Baluhqa 2018 senesi iyün 19-ğa qadar tevqif etilüv şeklinde sıñırlav tedbirini sayladı.

Mart 28-de Ukraina Tış işleri nazirligi Baluhnıñ deral azat etilmesini talap etti.

Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.

Baluhnıñ imayesi ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.

XS
SM
MD
LG