Rusiyede mahküm etilgen ve cezasını Rusiyedeki Salavat şeeriniñ koloniyasında çekken qırımlı Ruslan Zeytullayevni cezalav izolâtorına qapadılar. Bunı advokat Emil Kurbedinov bildire.
Kurbedinov: «Ruslannı, cezasını çekken Başqortostan Cumhuriyeti, Salavat şeeriniñ koloniyasında kün tertibini bozğan emiş deye, cezalav izolâtorına qapağanları aqqında malümat keldi! Bu vaqianıñ tafsilâtları şimdilik elimizde yoq!», – dep yazdı.
O, advokatlarnıñ, onı ilhaq etilgen Qırımda bulunğan koloniyağa avuşturmaq talabınen Rusiyeniñ Cezalarnı eda etüv federal hizmetine muracaat yollağanlarını ilâve etti.
Zeytullayev, Rusiyede ve onıñ tarafından ilhaq etilgen Qırımda yasaq etilgen «Hizb ut-Tahrir» teşkilâtınıñ başlanğıç bölügini meydanğa ketirgeninde qabaatlanıp, mahküm etildi.
2017 senesiniñ iyülinde Rusiyeniñ Yuqarı mahkemesi Zeytullayev içün azatlıqtan marum etüv muddetini 15 yılğace arttırdı. Buña cevaben aqyarlı açlıq ilân etti.
Ukraina tış işleri nazirligi, Rusiyeniñ Yuqarı mahkemesi tarafından azatlıqtan marum etüv muddetiniñ arttırılmasına qarşı narazılıq bildirdi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.
