Devlet hainliginen qabaatlanıp, aps cezasına mahküm etilgen Qırım sakini İvan Yatskinni ceza izolâtorına yerleştirdiler. Bunı Qırım.Aqiqatqa advokta Nikolay Polozov haber etti.
"Yatskinni ŞİZO-ğa yerleştirdiler. Em de bir de bir bozuv içün degil, yer olmağanı içün. ŞİZO-daki qaidelerge köre, kündüz yataq divarğa baylana. Ve o, ağırğan ve hasta ayaqlarında üç kün turmaq mecbur edi. Bu oña qarşa pek yaramay munasebet. Endi Brânsk, Örenburg vilâyetlerine etap etilecegi beklenile. Ve tek bundan soñ o Kemerovoğa barıp çıqacaq. Ne qadar vaqıt sürecegi belli degil", - dedi Polozov.
Advokat bunıñ aqqında Ukraina ombudsamanı Lüdmila Denisovanı haberdar etken.
"O, Rusiye insan aqları vekâletlisi Tatyana Moskalkavağa muracaat etcegini bildirdi", - dedi Polozov.
Onıñ aytqanına köre, al-azırda Yatskinnen korbşmek çare yoq, çünki ŞİZO-da ne qadar vaqıt tutulacağı belli degil.
Evel Nikolay Polozov İvan İyatskinniñ "ayaqları çürüy", dep bildirgen edi.
Mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Ukraina TİN dünya toplulığını İvan Yatskinge çıqarılğan ükümge cevap bermesine çağırdılar.
Ukraina Yuqarı Radasınıñ insan aqları vekâletlisi Lüdmila Denisova «devlet hainliginen» qabaatlanğan İvan Yatskinniñ ukmüni takbih etti.
Yatskin «devlet hainliginen» qabaatlandı (Rusiye ceza qanunnamesiniñ 275 maddesi – QA). Bu dava boyunca bütün mahkeme oturışları qapalı keçirildi, mahkeme, dava materiallarında devlet sırı olğanına atfı ete edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep ayta.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.
