“Strelkovaya” “narazlıq meydanı"nıñ faalcisi, avgustnıñ 3-ünde rusiyeli Qırım memuriyeti yanında öz-özüni yaqmağa tırışqan, qırımtatar Vatan Karabaş özüni öldülmege istemegenini bildirdi.
“Men özümni aqlamayım. Men musulmanım, ve bu - büyük günâh, bu doğru degil. Birden aytam, özümni öldürmege niyetim yoq edi, men adamlarğa ateşimni söndürsinler dep rica ettim. Sağ olsunlar, söndürdiler”, - dedi Vatan Karabaş avgustnıñ 10-unda Aqmescitte matbuat merkezinde.
Daa evel Qırım.Aqiqatqa bergen intervyüde Karabaş o öz-özüni yaqmağa istegeni aqqında kimse bilmedi dep ayttı. Videoda Karabaş onı söndürsinler dep adamlarğa muracaat etkeni körünmey.
Diqqat! Tesir etici video!
Avgustnıñ 3-ünde Aqmescit merkezinde “narazlıq meydanı”nıñ qırımtatar faalcilerinden birisi, üstüne yanıcı şingenlik töküp, öz-özüni yaqtı. Amma yanında toplanğan adamlar aqaynıñ yanıp başlağan urbasını tez söndürdi. Yaquvdan evel, aqay akimiyetniñ zulum areketlerine qarşı öz-özüni yaqacağını ilân etti.
Oquñız: Aqmescitte «narazlıq meydanı»na rusiye telükesizlik hadimleri keldi
Qırımnıñ rusiye akimiyeti vekilleri qırımtatarlarnıñ evleri yerleşken topraqlarnı sata. Adet üzre, qurdurıcılar qora qoymasından başlay. Yerli sakinler ise buña qarşı narazlıq köstere.
Qırımtatarlar ev qurğan “Strelkovaya” “narazlıq meydanı”nıñ yerinde yañı 9 biñ adamlıq rayon qurmağa isteyler. Mesken evlerden ğayrı, mektepler, bala bağçaları, spor meydanları ve tükânlar qurmağa azırlanalar. Şimdilik anda esasen avdetçiler (repatriant) yaşay.
