“Krımskaya roza” rayonınıñ qurulacaq yerine, narazlıq köstergen yerli sakinlerge qarşı, rusiye telükesizlik hadimleri keldi, - dep haber ete avgustnıñ 2-nde qırımtatar milliy areketiniñ faalcisi Nariman Celâl.
Onıñ sözlerine köre, vaziyet kerginleşe. Nariman Celâl adise keçken yerde çekilgen video yükledi.
“Sabadan anda polis, tehnika ve 40-qa qadar “işçi” keldi. Keççe elinde leskernen daa yigirmige yaqın aqay keldi. Bir qaç yıl devamında bu topraqqa olğan aqqı içün küreşken adamlarnıñ etrafında toplaşıp, olarnı sarıp aldılar. Kimerleri esini coya. Mında endi “kazak”lar da peyda oldı. Olar, adamlarğa qarşı bir de bir areket yapmağa ıntılacaqlar dep körüne. Mında erkekler de, qadınlar da bar”, - dep yazdı Facebookta Celâl.
Yerli sakinler aytqanına köre, “narazlıq meydanı”nda çatışma ekinci kün devam etmekte. “Akura” qurucılıq şirketi evlerge yolnı qapatmaq istey dep saya yerli sakinler. Qurucılarğa qora qoymağa bermeyler.
Qırım telükesizlik hadimleri ve qurucı şirketniñ vekilleri simdilik vaziyet aqqında izaat bermeyler.
Qırımtatarlar ev qurğan “Strelkovaya” “narazlıq meydanı”nıñ yerinde 9 biñ kişilik yañı rayon qurmağa isteyler.
Mesken evlerden ğayrı, mektepler, bala bağçaları, spor meydanları ve tükânlar qurmağa azırlanalar. Şimdilik anda esasen avdet etkenler (repatriant) yaşay.
