Qırımda «gaz borusındaki diversiyağa» şübheli sayılıp apiske alınğan qırımtatar siyasetçisi ve faali Nariman Celâl SİZO hadimileri oña bermegen mektüplerniñ bir qısmını aldı. Bu aqta Celâlnıñ advokatı Nikolay Polozov haber etti.
«SİZO hadimi Narimanğa mektüplerniñ bir qısmını berdi. Daa tsenzorda qala, dep ayttı. Faqat başqa problem çıqtı. Elektron sistemadan mektüplerni qabul etip bastırğan cihaz (anda bunıñ içün bir cihaz da bar eken) bozuldı. Ne Qırımda, ne de Qırımğa yaqın olğan RF regionlarında bu parça yoq. Şunıñ içün cihaz tamir etilgenine qadar Narimanğa eski yollarnen – poçta vastasınen yollamaq kerek», – dep ayttı Polozov.
İmayeci, Celâlnıñ alı «bir qarar, bir sağlıq şikâyeti yoq», dep ayttı.
«O birisi kün kameranı, niayet, qızdırıp başladılar. Bu tutuv şaraitlerinen bağlı eñ müim mesele edi. Qışta qızdıruvsız taşta bulunmağa sağlıq içün zararlıdır. SİZO reberligi mahsus blokta qızdıruv sistemasını tamir etüv imkânını tapqandır», – dep bildirdi Polozov.
Advokat, Nariman er kün FSB idaresine cinaiy davanen tanış olması içün alıp ketirile, dep qoştı. Tahqiqatçı bazarertesi künü Rusiye kontrolindeki Aqmescitniñ Kiyev rayon mahkemesine dava boyunca qabaatlanğanlarğa qarşı sıñırlav tedbirlerini uzatuv muracaatını bermege planlaştıra, dep bildirdi.
Apiske alınğan Nariman Celâl tutulğan Aqmescit SİZOsınıñ kamerası uzun vaqıt qızdırılmadı.
Dekabrniñ 15-nde advokat Nikolay Polozov Qırımda Rusiye quvetçileri Anğara köyünde «gaz borusındaki diversiya» davası boyunca ilk tahqiqatnı yekünledi, Nariman Celâlğa daa bir qabaatlav qoşuldı, dep bildirdi.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Dekabrniñ 3-nde Rusiye kontrolindeki Qırım Yuqarı mahkemesi Celâlnıñ apiste tutuv müddetini uzatuv qararına qarşı istinaf şikâyetini red etti.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
