Qırımtatar faali ve siyasetçi Nariman Celâlğa yañı qabaatlav kösterildi. Bu aqta advokat Nikolay Polozov bildirdi.
«Qırım Cumhuriyeti ve Aqyar şeerindeki FSB idaresiniñ tahqiqat bölüginde Nariman Celâl ve imayecileriniñ iştiraki ile tahqiqat tedbirleri yekünlendi. Nariman Celâlğa yañı qabaatlav kösterildi. Bundan evel teşkilâtlanğan gruppa erkânında diversiya yapuv (Rusiye Federatsiyası Ceza kodeksiniñ 281-inci maddesiniñ 2-nci qısmı «a» punktı) ve teşkilâtlanğan gruppa tarafından patlayıcı maddelerni qanunsız satın aluv, saqlav ve taşıma (Rusiye Federatsiyası Ceza kodeksiniñ 222.1 maddesiniñ 4-ünci qısmı) qabaatlavlarından ğayrı bugün Nariman Celâl patlayıcı cihaznı qaçaqçılığında qabaatlandı. Yani Gümrük birliginiñ gümrük sıñırından YevrAzES çerçivesinde teşkilâtlanğan gruppa tarafından patlayıcı cihaznı qanunsız keçirüv (Rusiye Federatsiyası Ceza kodeksiniñ 226.1 maddesiniñ 3-nci qısmı)», – dep yazdı Polozov Facebookta.
Advokatnıñ qayd etkenine köre, bu maddege köre 7 yıldan 12 yılğa qadar azatlıqtan marum eteler. Polozovnıñ aytqanına köre, Celâlnıñ sağlıq vaziyeti bir qarar, «keyfi yahşı, tendürist».
Celâlnıñ imayecilerine tarif etkenine köre, keçken cumaaqşamı künü onı ekspertizada bulunğan 15-inci psihiatrik hastahanesinden SİZOğa keri qaytardılar.
«Narimannı tutuv şaraitleri eski qala. Bizge kamerası (ve umumen Mahsus blok) qızdırılmay, dep ayttı. Qırımğa suvuqlar kelecegi içün bu ciddiy bir problem ola bile. Bundan ğayrı, kameradaki pencere yahşı qapanmay. Narimanğa mektüp de bermeyler. Bir mektüp berdiler, qalğanları tsenzorda qala. Şunıñ içün dünyadaki adise-vaqialar aqqında tek advokatlardan haber ala bile», – dep ayttı Polozov.
FSB Celâlğa qarşı qabaatlavnı endi sertleştirgen edi, Nariman Celâlnıñ diversiya yapıluvına yardım etüv qabaatlavı diversiyada iştirak etüvge deñiştirilgen edi. Soñra qabaatlav daa bir kere sertleştirildi, Celâl 20 yılğa qadar apiske alına bile.
Oktâbrniñ 28-nde Qırımda tevqif etilgen qırımtatar faali ve siyasetçisi Nariman Celâlnıñ tevqif müddeti 2021 senesi yanvarnıñ 23-ne qadar uzatıldı.
Oktâbrniñ 7-nde Nariman Celâl psihiatrik hastahanege mecburiy ekspertizağa yatqızıldı.
Qırımlı ukrain rejissöri Oleg Sentsov Qırım.Aqiqatqa tefsir berip, Aqmescitte Nariman Celâlnıñ tutuluvı Rusiye akimiyetiniñ Ukrainağa qoltutqan diger faallerni qorquzuv usulı ola, dep ayttı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
