Apiske alınğan qırımtatar siyasetçisi ve faali Nariman Celâlğa Aqmescit SİZOsına bütün mektüpler ketirilmey, dep bildirdi advokatı Nikolay Polozov dekabrniñ 1-nde.
«Narimanğa mektüpler öyle de kelmey. Yaqında noyabrniñ başında yazılğa üç mektüp berildi, o qadar. Amma oña onlarnen insan yaza», – dep bildirdi imayeci.
Advokatnıñ malümatına köre, küzniñ soñki künleri Celâl tutulğan kamera «niayet, qızdırılıp başladı». Bu, Polozov Cemaat nezaret komissiyasınıñ azalarından ve SİZO reberliginden meseleni çezmelerini rica etken soñ oldı.
«Narimannıñ kamerası qızdırılmay, dep bildirdim ve al etmege rica ettim. Olar Narimanğa barıp baqtılar ve aqşam üstü batareyalar bayağı sıcaq oldı», – dep bildirdi Polozov.
Onıñ aytqanına köre, Narimannıñ alı «bir qarar», sağlığını şikâyet etmey. Kamerada tutulğan diger insan ise suvuqlandı.
«Nariman qoltutqan er keske teşekkürler bildire ve selâm ayta!», – dep yazdı Polozov.
Rusiye apishane hadimmleri Polozovnıñ aytqanlarını açıq şekilde tefsir etmey.
Nariman Celâl tutulğan Aqmescit SİZOsınıñ kamerasında uzun vaqıt qızdıruv yoq edi.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Celâl insanlarnı oña ve Anğaradaki «gaz borusında diversiya» davasınıñ daa eki mabüsi Aziz ve Asan Ahtemovlarğa mektüp yazmağa çağıra.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
