Rusiye FSBsi yarımadada tutulğan qırımtatar faali Nariman Celâlnıñ davasını ğayrıdan tasnif etip, qabaatlavnı deñiştirdi ve onı yardım etüv yerine diversiya yapqanında qabaatladı. Bu aqta advokat Nikolay Polozov Facebook saifesinde bildirdi.
Onıñ malümatına köre, Celâl Rusiye Ceza kodeksiniñ 281-inci maddesiniñ 1-inci qısmına istinaden cinayet yapqanında, yani diversiya yapqanında qabaatlandı.
«FSB, Nariman qabaatlanğan areketni diversiyağa yardım etkeninden diversiyada iştirak etkenine deñiştirdi, böylece qabaatlavnı daa qattı yaptı», – dep yazdı Polozov.
Onıñ aytqanına köre, Rusiye tahqiqatı Nariman Celâl ve imayecilerine bir sıra ekspertiza yapılacağına dair qararlarnı ve endi azır olğan ekspertlerniñ hulâsalarını tanıttı. Polozovnıñ qayd etkenine köre, FSB bu dava boyunca 12 ekspertiza yapılacağını belgiledi, bazıları endi yapıldı.
«Qabaatlav tanıtılğan soñ qabaatlanğannıñ sorğusı keçirildi. Nariman Celâl qabaatlanğan kişiniñ şaatlıq etmemege aqqından faydalandı», – dep qayd etti advokat.
Polozov, tahqiqat tedbirleri başlamazdan evel advokatlarğa Nariman Celâlnen laf etmege imkân berildi, dep qoştı.
«O, onı Aqmescit SİZOsında eki kişilik kamerada daa bir insannen – «İyegova şaatları» davasınıñ mabüsinen – tutalar, dep bildirdi. Nariman Celâlovnıñ sağlıq vaziyeti bir qarar, keyfi yahşı. Tutuv şaraitleri ve SİZO hadimleriniñ yanaşuvı bir qarar. Kamerada buzdolabı yoq, aşlarnıñ saqlanması zorlaşa, ve pencere yahşı qapalmay, avalar suvusa, bu problem ola bile», – dep qayd etti advokat.
Ukraina Yuqarı Radası qırımtatarlarnıñ, hususan sentâbrniñ 3-4-nde tutulğan Nariman Celâl ve Aziz ve Asan Ahtemovlarnıñ taqibini toqtatmağa talap etti. Bu beyanat qararınıñ qabul etilüvine 293 halq deputatı rey berdi, rey berüv neticeleri parlamentniñ resmiy saytında derc etildi.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete. Advokat Nikolay Polozovnıñ sentâbrniñ 8-nde bildirgenine köre, imaye Rusiye kontrolindeki Aqmescit mahkemesiniñ qırımtatar faali Nariman Celâlnı apiske almaq qararını şikâyet etti.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.