Kreml kontrolindeki Aqmescitteki Kiyev rayon mahkemesi raatlıq künleri tutulğan qırımtatar siyasetçisi ve faali Nariman Celâlnı eki ayğa, noyabrniñ 4-ne qadar, apiske aldı. Bu aqta «Qırım birdemligi» cemaat birleşmesi Qırım.Aqiqatqa bildirdi.
«Tahqiqatçı Vitaliy Vlasov sıfatında qabaatlav tarafı Celâlnı apiske yollamağa qarar berdi, çünki o, ağır cinayet yapqanından şübheli ola ve adliyeden saqlana bile. İmmaye tarafı bu delillerni inkâr etip, qabaatlavnıñ muracaatını red etmege rica etti. Celâlnıñ kiçik balaları ve onıñ baqımında olğan hasta ana-babası bar. Onıñ aytqanına köre, ev apsi oña uquq qoruyıcılarnıñ menfaatları ve qorantasınıñ menfaatları arasında balans saqlamağa yardım eter edi», – dep bildirdi birleşme.
Nariman Celâl 2014 senesinden berli cinaiy taqipke oğray bilecegini tahmin etkenini aytıp, er seferinde Qırımğa qayta ve yarımadadan ketmege razı olmay edi, dep bildirdi.
«Keçenlerde Rusiye akimiyeti tarafından menfiy qıymet kesilgen «Qırım platformasınıñ» açılış sammitine bardım. Qırım reberligi «Qırım platformasınıñ» iştirakçileri taqip etilecek, dep açıq-açık aytqan edi, amma, böyle beyanat ve telükelerge baqmadan, evime qayttım. Şimdiki vaziyet, hususan iç razı olmağan cinaiy davam sebebinden Qırımnı ve evimni terk etmege niyetim yoq», – dedi Celâl.
Apiste tutuv şeklinde sıñırlav tedbirini «tamamen kerekmegen» dep adlandırdı.
«Ev apsi şeklinde sıñırlav tedbirini yeterli dep sayam. İlk talap esasında tahqiqat tedbirleriniñ keçirilüvine kelmek içün kelişe, qoranta başı ve oğul vazifelerini yapmağa imkânım olur, ömür arqadaşım ve esli-başlı ana-babamnıñ raat yaşamasını temin eter edim. Ev apsi bularnı yapmağa imkân berir», – dedi qırımtatar faali.
Onıñ qayd etkenine köre, Rusiye qabaatlavı onı apiske alıp, «onı cemaattan izolâtsiyada tutacaq» ola.
Qırımda sentâbrniñ 3-nde ve 4-nde tintüvler vaqtında tutulğan dört qırımtatarı tutuldı. Eki doğmuş ağa-qardaş Aziz ve Asan Ahtemovlar eki ayğa, noyabrniñ 4-ne qadar, apiske alındı.
Aziz Ahtemovnıñ babası Eskender 10 künge apiske alındı. Asan Ahtemovnıñ qardaşı Arsen 15 künge apiske alındı. Eskender ve Arsen «politsiyağa itaat etmegeni» içün nezaret altına alındı. Ekisi de sentâbrniñ 4-nde Qırımdaki FSB binası ögünde tutuldı.
Advokat Ayder Azamatovnıñ bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket Useinov ve Eldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı – Nariman Celâl, Aziz Ahtemov, Asan Ahtemov, Eldar Odamanov ve Şevket Useinovnı – Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Rusiye quvet müessiseleri raatlıq künleri Qırımda insanlarnıñ tutuluvına dair malümatnı resmiy şekilde alâ daa tefsir etmedi. Qırımnıñ Rusiye akimiyetine yaqın «Krıminform» saytı sentâbrniñ 5-nde uquq qoruyıcı organlardaki menbalarğa esaslanıp, «sentâbrniñ 4-nde cinaiy dava çerçivesinde operativ-tahqiqat tedbirleri keçirildi. Beş İnsan tutuldı, olarnıñ arasında Nariman Celâl da bar, sıñırlav tedbirleri meselesi baqıla», dep bildirdi.
