Dostlar!
Şerefli iştirakçiler ve maña yaqın insanlar ile beraber olıp, sözge çıqmağa imkân olğan «Qırım platforması»ndan qaytqanımdan deral soñra tevqif etilüvim Rusiye ükümeti intiqam alğanına delâlet ete.
O, öz halqı ve devletiniñ meraqları içün demokratik degerlikler ve azatlıqlar oğrunda açıq küreşni devam etken insanlarnı quvmağa, tecrit etmege azır olğanını köstermege devam ete.
Men böyle olacağına azır edim. Ve büyük ağalarımız kibi öz mesleklerimden vazgeçmeycegim. Mında apiste elimde olğan yollarnen küreşimni devam etecegim
Evimde tintüv vaqtında onı keçirgen hadim laf arası dedi:
«Siziñ silâñız – söz. Ve bu daa telükelidir».
Demek menim «silâm» mennen. Menim sözüm mennen. Menim sözüm siznen!
Keri çekilmeñiz! Toqtamañız! Vaqıt coymañız!
Menim halqım!
Menim «silâm» mennen. Menim sözüm mennen. Menim sözüm siznen!
Şiddet qurbanınıñ ona qarşı etilgen şiddette özü suçlu olğanını aytacaq ekiyüzlü qabaatlayıcılarğa inanmañız! Deycekler ki, özüm böyle olğanını istedim, sakin olsa edim, ailem ile evde qalır edim.
Amma bizge böyle davranmağa mümkün degil.
Sekiz yıl evelsi siz, menim halqım, siziñ menfaatlarıñıznı taqdim etmege aq maña berdiñiz. Yüksek status ve mesüliyet berdiñiz. Men de susıp ve saqlanıp olamadım.
Men bu yolnı seçtim ve keri çekilmeycegim. Yanımda sevgilim apayım, menim yaqın dostlarım, bütün halqım ve bütün dünya. Ve iç bir divarlar bunı deñiştirip olamaz.
Teslim olmañız!
Maña yapqanları sizni qorqutmasın, çünki bu olarnıñ maqsadlarından biridir.
Atalarımz altın tamğa ile kök tüsündeki bayrağımıznı ğurur ile taşıdılar. Biz de bunı yapmaq kerekmiz!
Advokat Nikolay Polozov Aqmescitte yaqalanğan qırımtata rfaali Nariman Celâlnıñ metübini yayınladı. Mektüpte Celâl böyle olacağına azır olğanını yazdı ve halqnı keri çekilmemege ve toqtamamağa çağırdı.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.