Qırımtatar bayraq kününde Qırım.Aqiqat Qırımda apiske alınğan ve Rusiye mahkemesi tarafından 17 yılğa üküm etilgen Qırımtatar Milliy Meclisiniñ reis muavini Nariman Celâlnıñ muracaatını derc ete. Qırımtatar siyasetçisi «Qırımda angi bayraq dalğalanğanını» müim saymağan er keske cevap bere ve semetdeşlerini saylavını yapıp, qarar almağa çağıra – «Eki bayraq – bir devlet».
Qırımtatarlar Qırımda olğan devlet bayrağına baqmadan, milliy menfaatlarını qorumaq kerek degen fikirni eşittim. Bir taraftan doğrudır. Vaziyetke baqmadan, medeniyet inkişafı, gençlerniñ terbiyesi, tilniñ saqlanması, kimlikni pekitüv vazifelerimiz bar. Halqnıñ ihtiyacları olğan şeylerge irişüv. Amma bu, belli bir seviyede, – primitiv bir yanaşuv.
Milliy menfaatlarımıznıñ aslını aytsaq, başında aytılğan fikir yañlış olur. Çünki qırımtatar halqınıñ bugünki alı onıñ inkişafına iç de yardım etmey. Bazı meselelerde ise subyektliginiñ degradatsiyasına sebep ola.
Eminim, şimdiki vaziyetniñ üst talili bile bir hulâsa çıqarmağa imkân bere, Qırımdaki siyasiy sistema qırımtatarlarğa tek ananeleri ve temel ihtiyacları olğan etnik cemiyet olaraq yaşamağa izin bere. Bu da maniasız degil ve olarnı yeñmek içün ğayret köstermeli. Sıq-sıq faydasız bir şekilde.
Bayraq, yani istiqbalnı saylav kerek olğanı açıqtır. Menim içün bu saylav añlaşılğan ve adiydir
Qırımtatarlarnı mümiyağa çevirip, Rusiye olğan sovetler soñrası bugünniñ müzeyiniñ daa bir eksponatını yapalar. İçinde bulunması öz halqınıñ tabiiy aqlarından vazgeçüvni talap etken «halqlarnıñ dostluğı», «çoq milletli cemiyet» qoruğınıñ daa bir unsurı yapalar. Adise-vaqialarğa qıymet kesmek, onı açıq-açıq bildirmek, öz qararlarını qabul etmek ve olarnı yerine ketirmek aqqından vazgeçmek kerek. Yani serbest olmaq aqqından marum eteler.
Qırımtatarlar subyekt olaraq qalmağa, kelecegini anane ve qıymetlerine köre inkişaf vektorını belgilemege istese, bayraq, yani istiqbalnı saylav kerek olğanı açıqtır. Menim içün bu saylav añlaşılğan ve adiydir.
Qırımtatar bayrağınıñ renkleri açıq cevap bere. Ukrayınler ve qırımtatarlar munasebetleriniñ uzun, qıyın tarihı. Zemaneviy Ukrayına devletiniñ meydanğa kelüvi içün ğayretler. Ve, şübhesiz, qıymet, maqsat ve usullar bu saylavnı belli yapa. Soñki yılları Ukrayına akimiyetiniñ qararları tek niyet olaraq aytılsa da, bu saylav daa mantıqlı ve doğru ola.
Altın tamğalı kök bayraqnıñ yelde dalğalanğanını körmek içün başıñıznı sıq-sıq köteriñiz
Semetdeşlerim, vaziyetniñ basqısı altında iç olmağanda fikir ve tüşünceleriñizde qoyulğan sıñırlardan çıqmağa qorqmañız. Ve tek fikir yürsetmege degil, halqımıznıñ hayrı içün areket etmege azır oluñız.
Altın tamğalı kök bayraqnıñ yelde dalğalanğanını körmek içün başıñıznı sıq-sıq köteriñiz!
Bayraq künü hayırlı olsun!
Eki bayraq – bir devlet!
Altın tamğalı kök bayraq. Qırımtatar bayrağı 1917 senesinden künümizge qadar (fotoresimler)
Ukrayınceden tercime etildi
Nariman Celâl
Qırımda apiske alınğan qırımtatar faali, siyasetçi ve jurnalist Nariman Celâlnıñ muracaatını iyünniñ 26-nda Qırımtatar Milliy Meclisiniñ reisi Refat Çubarov Facebook saifesinde derc etti
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.