Qırımda tevqif etilgen qırımtatar faali ve siyasetçi Nariman Celâl advokatı Nikolay Polozovğa Rusiye tarafından taqip etilmesine dair yañı bir mektüp berdi. Bunı advokat Facebook saifesinde haber etti.
"Nasıldır FSB hadimi tarafından uydurılğan qabaatnıñ metinini oquğanda, aynı zamanda külmege ve ağlamağa isteyim. Öz qanunsız areketlerini aqlamaq içün meni tevqif etkenlerniñ zayıf hayal küçü olğanından külecegim kele. Bu şübesiz Qırımda qırımtatar milily areketiniñ liderlerinden birini itibardan tüşürmek ve böyle etip daima zorbalıqsız küreş usullarını qullanğan areketniñ özüni qabaatlamaq içün yapıla", - dep yazdı Celâl.
O, Rusiye akimiyeti er zaman "Qırımnıñ tamır halqınıñ tınç yaşamaq ve doğma topraqlarında inkişaf etmek istegini desteklegen" dünya toplulığını "yüzlernen faaller, miliy özidare etme organlarınıñ azaları, qırımtatarlar zorbalıq areketlerine azır olğanına" inandarmağa tırışa, dep saya.
"Men ve başqaları Ukraina topraq bütünligine destek bildirip, insan aqlarını qorçalap ve basqılarğa ve Rusiyeniñ areketlerine qarşı çıqıp gizlemegen meslekler. Çünki bütün "suçumız" mesleklerimizge saip olamaq ve olarnı açıq şekilde ifade etmek cezaretindemi", - dep qoştı o.
Hastahanege psihiatrik ekspertiza içün yatqızılğan Aqmescitte tevqif etilgen qırımtatar faali ve siyasetçi Nariman Celâl advokat Nikolay Polozovğa hastahanedeki şarait aqqında aytıp berdi.
2018 senesi Rusiye apsinden azat etilgen ukrainalı deñizciler Vladislav Kostişin ve Bogdan Golovaş Qırımda apiske alınğan qırımtatar faali ve siyasetçisi Nariman Celâlğa sebat ve metanet tiledi.
Nikolay Polozov oktâbrniñ 8-nde Nariman Celâl psihiatrik ekspertizağa yollanğannı haber etti.
Daa evel advokat, tevqif etilgen qırımtatar faali Nariman Celâlnıñ mektüpler almağanını bildir
Bundan evel berilgen malümatqa köre, faalniñ qabaatlavı sertleştirildi, şimdi 20 yılğa qadar azatlıqtan marum etile bile. FSB, Nariman qabaatlanğan diversiya yapıluvına yardım etüvni diversiyada iştirak etüvge deñiştirip, qabaatlavnı sertleştirgen edi.
ABD OSCE missiyası Nariman Celâlnı ve üç doğmuş qardaş Ahtemovlarnı acele azat etmesine çağırğan edi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
