2018 senesi Rusiye apsinden azat etilgen ukrainalı deñizciler Vladislav Kostişin ve Bogdan Golovaş Qırımda apiske alınğan qırımtatar faali ve siyasetçisi Nariman Celâlğa sebat ve metanet tiledi.
Golovaş Qırım.Aqiqatqa bergen intervyüsında Ukraina akimiyeti qırımtatar faali ve siyasetçisine azatlıqqa çıqmağa yardım eteceginden emin olğanını bildirdi.
«Oña sebat tileyim ve onı azat eterler, dep işanam. Eminim, Ukraina akimiyeti onıñ azat etilmesi içün elinden kelgenini yapacaq», – dep ayttı Ukraina Arbiy-deñiz quvetleriniñ arbiyi.
Onıñ işdeşi Kostişin de Celâlğa qoltutuv sözlerini ayttı.
«Narimanğa sebat, er şey deñişecek ve er şey yahşı olacağını añlamaqnı tileyim. Eñ esası – eñ yahşısına ümüt etmek. O, serbest olıp, qorantasına qaytar, dep tüşünem», – dedi Kostişin.
Kostişin ve Golovaş 2018 senesi noyabrniñ 28-nde Keriç boğazı yaqınlarında FSB tarafından zapt etilgen ve 2019 senesi sentâbrniñ 7-nde Ukraina ve Rusiye arasında keçirilgen şahıslarnı deñişüv neticesinde azat etilgen 24 ukrainalı deñizci arasında edi.
Rusiye quvetçileri Qırımda Celâlnı «teşkilâtlanğan gruppa erkânında diversiyada – Anğara köyünde gaz borusını patlatqanında» qabaatlay.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
