Link açıqlığı

Saatnıñ esas haberi

Nariman Celâl: «Okoplarda saqlanıp, ğalip çıqmaylar»


Qırımtatar siyasetçisi, oca, siyasetşınas ve jurnalist Nariman Celâl, arhiv fotoresimi
Qırımtatar siyasetçisi, oca, siyasetşınas ve jurnalist Nariman Celâl, arhiv fotoresimi

Qırım.Aqiqat, Qırımda apiske alınğan qırımtatar faali, siyasetçi ve jurnalist Nariman Celâlnıñ yazılarını derc ete. Bundan evelki qısmını mında oquñız.

Balalığımda babamnen bir yerge barsaq, sabırsızlıqnen daa ne qadar qaldı, dep soray edim, babam sıq-sıq böyle cevap bere edi: «Ne qadar qalsa-qalsın, episi bizim».

Bu printsipni yahşı menimsedim.

Menden faaliyetimni işğal altındaki Qırımda daa ne qadar devam ettirmege imkân berecekler dep soray ediler: «Seni tezden apiske alırlar ya da quvarlar, dep tüşünmeysiñmi?». Men maqsadıma irişmek içün qalğan vaqtımdan faydalanmağa tırışacam, dep cevap bere edim.

Apis qararım bir zaman meselesi edi, bunı tek men bilmey edim. «Qırım platformasından» soñ, Qırımğa qaytmazdan evel, dostlarım daa bir kere tüşünmege teklif etken edi: belki, serbest topraqta qalmaq daa doğru olur.

Aq ve serbestlik, adalet ve aqiqat oğrunda printsipial zorbalıqsız küreşniñ vastası oldım. Amma onu siz qullanmalısıñız

Amma men er vaqıt qayta edim. Men bunı ne içün ve ne maqsadnen yapqanımnı bile edim. Şimdi aq ve serbestlik, adalet ve aqiqat oğrunda printsipial zorbalıqsız küreşniñ vastası oldım. Ahtem Çiygoz, Oleg Sentsov, Vladimir Baluh olğanı kibi ve daa onlarnen Kremlniñ siyasiy mabüsi kibi.

O, daima azır olsun dep, elimden kelgenini yapacam. Amma onı siz qullanmalısıñız.

Anda, Qırımdan yüzlernen kilometr uzaqta, bunı yaparlar, bilem.

Ya Qırımnıñ özünde yaparlarmı?

Dostlar, okoplarda saqlanıp, cenkte ğalip çıqmaylar.

Serbest yaşap, kelecegimizni quracaq olsa, küreşmekten ğayrı, başqa çaremiz yoq. Elimizde olğan vastalarnen küreşmeli.

Ve ğalebe qazanmalımız!

Nariman Celâlnıñ muracaatını Facebook saifesinde ömür arqadaşı Leviza derc etti.

Anğara köyündeki «gaz borusında diversiya» davası

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

Nariman Celâl, qırımlı jurnalist, qırımtatar milliy areketiniñ iştirakçisi

XS
SM
MD
LG