Qırımtatar halqınıñ lideri Mustafa Cemilev Qırımtatar halqınıñ sürgünlik ve genotsid qurbanlarını añma kününde Mustaqillik Meydanında çıqışta bulunıp, qırımtatarlar mayısnıñ 18-ni er vaqıt qayd etecekler, çünki «bu zaman aşıması olmağan bir cinayet», dep ayttı. Bu aqta Qırım.Aqiqat mühbiri bildire.
«Halqnıñ millet olaraq bar olmasına ücüm etildi. Rusiyelilerniñ maqsadı Qırımnı olarğa köre «kerekmegenlerden» temizlemek ve Qırımnı «temiz rus» toprağı yapmaq, «rus dünyasını tarqatmaq» edi», – dedi o.
Onıñ qayd etkenine köre, şimdi Rusiye ile küreşte qırımtatarlar bir özleri degiller.
«Sovetler vaqtında bu büyük sert rejimnen bir özümiz küreşken olsaq, şimdi Ukraina devleti biznen beraber, medeniy cemiyet biznen beraber, dünyanıñ bütün demokratik küçleri biznen. Ümüt etemiz ki, tezden Qırım qaytarılacaq, işğalciler quvulacaq ve, belki, Rusiye medeniy demokratik devlet olur», – dep qayd etti Cemilev.
Kyivde qırımtatar halqınıñ sürgünligi ve genotsidiniñ qurbanları hatırasına avtoyürüş keçirildi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar. Tedbir Rusiye quvetçileriniñ nezareti altında keçti.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
