Qızıl meydandaki narazılıq aktsiyasında iştirak etken yedi qırımtatar faali Moskvanıñ «Kitay-gorod» politsiya bölüginden yiberildi, memuriy cinayetlerge dair protokollar tizildi. Bu aqta advokat Aleksandr Pihovkin Qırım.Aqiqatqa tarif etti.
«Olarnı Memuriy cinayetler kodeksiniñ 20.2 maddesiniñ 5-inci maddesine – toplaşuv, miting, numayış, yürüş ya da narazılıq aktsiyasını keçirüv tertibiniñ açıq bozuluvı – istinaden qabaatlaylar. Mahkeme tecribesine baqılğanda, mezkür madde boyunca insanlar 10 biñ rubleden başlap para cezalarını ala», – dedi o.
Advokatnıñ aytqanına köre, politsiya hadimleri «tutulğanlar izzetli yaşında olğanı içün» özüni nezaketli alıp bardı.
Onıñ qayd etkenine köre, memuriy protokollar «hatalarnen tizildi».
«Üç esas qaide bozuldı: memuriy tahqiqatta ana tilinde iştirak etüv, terciman aqqı ve imayeci aqqı. Vesiqalarda cinayet tafsilâtlıca añlatılmay, tek olğanı qayd etile», – dep qoştı advokat.
Onıñ bildirgenine köre, yedi faalniñ mahkeme oturışuvları Moskvanıñ Tver rayon mahkemesinde keçirilecek.
Qırım.Aqiqat Moskvadaki «Kitay-gorod» politsiya bölüginiñ hadimi ile bağlandı, lâkin o, tutulğan faallerniñ bulunğan yeri aqqında suallerge cevap bermeyip, Moskvanıñ Merkeziy okrug iç işler idaresiniñ matbuat hızmeti ile bağlanmağa tevsiye etti. Anda ise mühbirniñ telefonlarını açmaylar.
İyülniñ 10-nda Moskvadaki Qızıl meydanda kütleviy narazılıq aktsiyasında iştirak etken yedi qırımtatarı tutulıp, Kitay-gorod politsiyasınıñ bölügine alıp ketirildi. Rusiye aq qorçalayıcısı Aleksandra Krılenkovanıñ aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev tutuldı. Tutulğan yedi qırımtatar faali miting keçirüv tertibini bozğanında (Rusiye Memuriy cinayetler kodeksiniñ 20.2 maddesi) qabaatlandı.
