İyülniñ 10-nda Moskvadaki Qızıl meydanda kütleviy narazılıq aktsiyasında iştirak etken yedi qırımtatarı tutulıp, Kitay-gorod politsiyasınıñ bölügine alıp ketirildi.
Bu aqta Rusiye aq qorçalayıcısı Aleksandra Krılenkova Qırım.Aqiqat mühbirine haber etti.
Onıñ aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev politsiya bölüginde tutula.
«Alâ daa bölükte bulunalar, jurnalist (adı aytılmay – QA) kirmege tırıştı, amma onı kirsetmediler. Advokat kelmesini bekleymiz. Memuriy protokollar tizilecekmi şimdilik aytması erte. Bölük ögünde beklemege devam etemiz», – dep tarif etti Krılenkova.
Qırım.Aqiqat Moskvadaki «Kitay-gorod» politsiya bölüginiñ hadimi ile bağlandı, lâkin o, tutulğan faallerniñ bulunğan yeri aqqında suallerge cevap bermeyip, Moskvanıñ Merkeziy okrug iç işler idaresiniñ matbuat hızmeti ile bağlanmağa tevsiye etti. Anda ise mühbirniñ telefonlarını açmaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
