İyülniñ 10-nda Moskvanıñ Qızıl meydanında kütleviy narazılıq aktsiyasında iştirak etip tutulğan yedi qırımtatar faali miting keçirüv tertibini bozğanında (Rusiye Memuriy cinayetler kodeksiniñ 20.2 maddesi) qabaatlandı.
Bu aqta tutulğan faallerden biri Sinaver Nimetullayev Qırım.Aqiqat mühbirine bildirdi.
Onıñ aytqanına köre, politsiya hadimleri faallerni mahkeme oturışuvına kelmege mecbur etti.
«Er birine qarşı 20.2 maddesine istinaden memuriy protokollar tizildi. Üç saattan soñ yiberecekler. Tezden (politsiya bölüginden – QA) çıqarmız, dep tüşünem. Mahkemege kelmege mecbur ettiler. Advokat keldi, protokollarnıñ fotosını çıqara. Mümkün olğanı qadar nezaketli laf ettiler», – dep ayttı Nimetullayev.
İyülniñ 10-nda Moskvadaki Qızıl meydanda kütleviy narazılıq aktsiyasında iştirak etken yedi qırımtatarı tutulıp, Kitay-gorod politsiyasınıñ bölügine alıp ketirildi. Rusiye aq qorçalayıcısı Aleksandra Krılenkovanıñ aytqanına köre, Fevzi Abduramanov, Eskender Lümanov, Sinaver Nimetullayev, Reşat Emirüseinov, Siyar Gafarov, Enver Seytumerov ve Seyran Cemilev tutuldı.
Qırım.Aqiqat Moskvadaki «Kitay-gorod» politsiya bölüginiñ hadimi ile bağlandı, lâkin o, tutulğan faallerniñ bulunğan yeri aqqında suallerge cevap bermeyip, Moskvanıñ Merkeziy okrug iç işler idaresiniñ matbuat hızmeti ile bağlanmağa tevsiye etti. Anda ise mühbirniñ telefonlarını açmaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
