Link açıqlığı

Saatnıñ esas haberi

"Men hatırlayım": qırımtatarlarnıñ sürgünligine bağışlanğan onlayn aktsiyanı başladılar


İlhaq etilgen Qırımda qırımtatarlarnıñ genotsidi qurbanlarınıñ hatırasına bağışlanğan "Men hatırlayım" onlayn aktsiyasını başladılar. Aktsiyanıñ teşkilcisi - "Nefes" cemaat teşkilâtıdır.

Bu teşkilâtnıñ koordinatorı Elmaz Qırımlı Qırım.Aqiqatqa aytqanı kibi, aktsiyada iştirak etmek içün çoq vaqıt kerekmey.

"Bu, er bir vatandaşımız umumiy hatıramıznı saqlanmaq içün vaqtını ayırmağa ne qadar azır olğanına bağlı. Zorbalıqnen sürgün etilgen qorantasınıñ qısqa olsa da ikâyesini yazıp qoymağa, süret çıqarmağa ve saifesinde paylaşmağa azır olğanına bağlı", - qayd etti Elmaz Qırımlı.

Böylece, aktsiyada iştirak etmek içün Facebook içtimaiy ağındaki saifede 1944 senesi Qırımdan sürgün etilgen soyunınıñ süretini yerleştirmek kerek. Süret olmasa, onıñ adını ve doğğan yerini, qayda sürgün etilgenini, Qırımğa qaytıp-qaytmağanını, qaç balası ve tornu olğanını yazıp derc etmek. Ve bu süretni saife sureti kibi yerleştirip "Men hatırlayım" heştegini qoymağa teklif etile.

Qırımtatar Milliy Meclis reisiniñ birinci müavini Nariman Celâl Qırım.Aqiqatqa tefsir bergende, öz tarihı, ğalebe ve faciaları aqqında hatırlamağa pek müimdir, dep ayttı.

"Bu vaqialar halqımıznıñ, er qırımtatarnıñ tabiatını şekilledi. Mayısnıñ 18-i qırımtatarlarnıñ yañı tarihınıñ eñ müim künlerinden birisi olğanından kimse şübelenmez, dep eminim. Onı hatırlamaq kerek, sebepleri ve aqibetlerini, qurbanları ve qatillerini bilmek kerek. Sadece özümiz içün degil, bütün insaniyet içün müimdir. Akimiyetniñ vicdansızlığı, insan ayatına laqaytlığı ve dünya ükümdarlığı isteginiñ ne neticeleri olğanını hatırlamaq kerekmiz", - qayd ettil Celâl.

"Men hatırlayım" aktsiyası mayısnıñ 18-inece devam etecek. Teşkilciler, onı er yıl keçirmege istegenlerini ayta.

Daa evel Qırımtatar Milliy Meclisi, Kyiv şeer yolbaşçısı Vitaliy Klıçkoğa mayıs 18 Qırımtatar genotsidiniñ qurbanlarını añma kününen bağlı muracaat yazdı.

Hatırlatamız, 2019 senesi mayısnıñ 18-nde qırımtatar genotsidi qurbanlarınıñ hatırasına umumukrain sükünet daqqası keçirildi. Matem tedbirleri tek Ukrainada degil, bir çoq dünya memleketinde de keçirildi.

Rusiye işğal etken Qırımda 2019 senesi resmiy olmağan matem tedbirleriniñ keçirilüvi yasaqlandı, keçirmek ıntıluvlarına ise keder etildi.

Daa evel Qırımtatar Milliy Meclis reisi Refat Çubarov mayıs 17-18-inde, qırımtatar halqınıñ sürgünligine bağışlanğan matem merasimleriniñ azırlanuvını ilân etti.

Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.

Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.

XS
SM
MD
LG