Qırımtatar Milliy Meclisi, Kyiv şeer yolbaşçısı Vitaliy Klıçkoğa mayıs 18 Qırımtatar genotsidiniñ qurbanlarını añma kününen bağlı muracaat yazdı. Bu aqta Meclis reisi Refat Çubarov bildirdi.
O, vesiqanı Facebook saifesinde derc etti. Qayd etilgenine köre, koronavirus şaraitlerinde bu sene qırımtatar halqı genotsidiniñ qurbanlarını añma kününe bağışlanğan hatıra tedbirleriniñ çoqusına azırlanmaq imkânsız oldı. Şu sebepten «Kyiv soqaqları ve meydanlarınıñ uyğun bir şekilde süslenmesi» pek büyük emiyet taşımaqta.
Meclis, Kyiv yolbaşçısından «2020 senesi mayısnıñ 18-nde Kyiv şeer şurası ögündeki bayraq sırıqlarında ve memuriy binalarda, rayon şuralarında, şeer ve rayon akimiyeti qurulış bölüklerinde (baş idareleri, mustaqil bölük idareleri) ve olarnıñ emri astındaki müessiseler, diger devlet ve kommunal müessiselerinde olğan Ukraina devlet bayraqlarınıñ qara şeritlernen süslenmesinen» bağlı emir bermesini rica etti.
Vesiqada «Qırım evi» azırlağan «1944 senesi mayıs 18-niñ qırımtatar halqı faciasını aks etken» resimni reklamada yerleştirmek ricası da bar.
Bundan ğayrı, Meclis «2020 senesi mayısnıñ 18-nde şeer soqaqları ve meydanlarında eglenceli kütleviy tedbirlerniñ keçirilüvinden vazgeçmege» rica ete.
Hatırlatamız, 2019 senesi mayısnıñ 18-nde qırımtatar genotsidi qurbanlarınıñ hatırasına umumukrain sükünet daqqası keçirildi. Matem tedbirleri tek Ukrainada degil, bir çoq dünya memleketinde de keçirildi.
Rusiye işğal etken Qırımda 2019 senesi resmiy olmağan matem tedbirleriniñ keçirilüvi yasaqlandı, keçirmek ıntıluvlarına ise keder etildi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
