Qırımtatar Milliy Meclisiniñ reisi Refat Çubarov qırımtatar halqı genotsidiniñ qurbanları hatırasına bağışlanğan añma merasimleri endi tasdıqlandı, dep bildirdi ve olarnıñ cedvelini derc etti. Onıñ aytqanına köre, olar mayısnıñ 18-nde ve onıñ arfesinde Ukrainada, hususan işğal etilgen Qırımda ve diger memleketlerde keçirilecek.
Çubarovnıñ qayd etkenine köre, COVID-19 pandemiyası sebebinden em Ukrainada, em diger devletlerde qabul etilgen sıñırlav tedbirleri añma tedbirleriniñ şekli ve tarzını bayağı deñiştirdi.
«Qırımtatar halqı menligini ve toprağına sadıqlığını saqlap, Qırımnıñ Rusiye işğali şaraitlerinde 1944 senesi mayıs 18 genotsidiniñ qurbanlarını añacaq. Amma epimiz rus işğalcilerinden qurtarılğan Qırımda toplaşıp, qırımtatar halqı genotsidiniñ qurbanlarını añacaq, qırımtatar milliy areketiniñ şanlı iştirakçilerinen quçaqlaşacaq, Rusiye apishanelerinden azat etilgen qırımlı siyasiy mabüslerni tebrikleycek vaqıt mıtlaqa kelecektir», – dep yazdı o.
Refat Çubarovnıñ aytqanına köre, derc etken planına qırımtatar diaspora teşkilâtları faaliyet köstergen memleketlerde ilâveler yapılacaq.
Qırımtatar Milliy Meclisiniñ reisi Refat Çubarov mayısnıñ 17-18-nde keçirilecek qırımtatar halqınıñ genotsid qurbanlarınıñ hatırasına bağışlanğan añma tedbirleriniñ azırlanılğanını ilân etken edi. O, Kyiv şeer yolbaşçısı Vitaliy KlıçkoğaQırımtatar halqı genotsidiniñ qurbanlarını añma kününen bağlı muracaat etti.
Aprel ayında Qırımda Rusiye politsiyası qırımtatarlarğa tenbi vesiqalarını berip başladı. Aralarında qırımtatar milliy areketiniñ faalleri, «Qırım birdemliginiñ» aq qorçalayıcıları ve jurnalistleri bar edi. Bu tenbilerde «ekstremist faaliyeti qabul etilmeycek» dep aytıla, hususan mayısnıñ 18-nde, qırımtatarlar 1944 senesiniñ sürgünlik qurbanlarını añğanda.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
