NHK telekanalı haber etkeni kibi, Yaponiyada, koronavirus hastaları bar olğan Diamond Princess kruiz gemisiniñ dörtünci yolcusı elâk oldı. Telekanalnıñ subetdeşlerine köre, ölgen adam hastahanede tedaviylevni keçken 80 yaşındaki bir hastadır, haber ete "Nastoyaşçeye vremâ".
Amma Diamond Princess laynerinde olğan ukrainler laynerden tahliye etilmekni red etti, bildirdi Ukraina TİN-niñ vekili Maksim Kovalenko. O, gemide 25 Ukraina vatandaşı bar olğanını ve olar ekipaj azaları olğanını aytıp berdi. Olarnıñ ekisini daa evel hastahanege alıp kettiler.
Yaponiya akimiyeti memleketniñ yalısında karantinde turğan Diamond Princess gemisinde hastalarnıñ umumiy sayısı 630-dan aştı. Fevralniñ 15-inde ekinci ukrainde 2019-nCoV koronavirusı qayd etildi.
Tünevin Qıtay Halq Cumhuriyetiniñ milliy sağlıq komissiyasınıñ bildirgenine köre, soñki kün devamında koronavirustan ölgenlerniñ sayısı 150 oldı. Qıtay ekimleriniñ aytqanına köre, 149 ölüm Hubey vilâyetinde, bir ölüm Haynan adasında qayd etildi. Umumen qırğınlıq devamında memlekette 49824 hasta qayd etildi.
Qıtaynıñ dört vilâyeti – Yünnan ve Guyçjou (eñ yüksek birinci seviyeden üçüncige) ve Guandun ve Şansi (birinciden ekincige) – koronavirusnen hastalanmaq telükesi eksilgenini bildirdi, dep haber ete Reuters yerli tibbiyet akimiyetiniñ malümatına esaslanıp.
İranda eñ az 12 kişi koronavirus sebebinden çıqqan COVID-19 hastalığınıñ qurbanı oldı. Memlekette koronavirusnen hastalanğan eñ az 61 insan qayd etildi.
İtaliyada ise Qıtaynıñ Uhan şeerinden tarqalğan yañı koronavirus yuqunçından üçünci kişi öldi, dep bildire Corriere della Sera. Gazetanıñ malümatına köre, şimaliy İtaliyanıñ Krema şeerinde esli-başlı qadın vefat etti. Daa evel İtaliyada koronavirustan ölgen eki kişi aqqında haber etilgen edi: hastalıqnıñ ilk qurbanları Lombardiya ve Venetsiyada yaşağan esli-başlı erkek ve qadın oldı.
SCMP malümatına köre, umumen yañı hastalıqtan dünyada 2468 insan can berdi.
