İranda eñ az 12 kişi koronavirus sebebinden çıqqan COVID-19 hastalığınıñ qurbanı oldı. Memlekette koronavirusnen hastalanğan eñ az 61 insan qayd etildi, dep bildirdi sağlıq naziriniñ muavini İrac Harirçi bazarertesi künü, dep haber ete Reuters haber agentligi. COVID-19 merkezi olğan Qıtay tışında eñ büyük ölüm sayısı mında qayd etildi.
Bu aqta Radio Azattık haber ete.
Hastalarnıñ eñ büyük sayısı Tehrandan 120 kilometr uzaqlığında Kum şeerinde qayd etile. Kumnı temsil etken parlament azası Ahmad Amirabadi Farahani fevralniñ 24-nde soñki eki afta içinde koronavirustan ölgen 50 insan aqqında bildirip, devlet qırğınlıqqa pek yavaş cevap bere, dep qayd etti.
Sağlıq nazirliginiñ vekili Harirçi bu malümatnı red etti. Devlet telekanalınıñ yayınında kösterilgen matbuat konferentsiyasında Harirçi, parlament azası aytqan raqamlar kerçekke yaqın olsa edi, sağlıq naziriniñ muavini vazifesini terk eter edi, dep ayttı. Bazarertesi künü, fevralniñ 24-nde, ilk koronavirus hastaları aqqında Küveyt, Bahreyn, Iraq ve Afğanistan ilân etti.
Iraqta hastalanğan kişi ilâhiyatçı student ve İran vatandaşı ola, o, sıñırlar resmiy şekilde qapatılmağandan evel memleketke keldi. Afğanistanda ise ilk koronavirus hastası İran ile sıñırdaki Gerat vilâyetinde qayd etilgen qayd etildi. Anda fevqulâde vaziyet rejimi ilân etildi.
Koronavirustan ölgenler olğanı içün İran ile qomşu memleketler sıñırlarnı qapattı ve bu memleketnen uçaq seferlerini sıñırladı, dep haber etilgen edi. Tacikistan da İran ile uçaq seferlerini vaqtınca qapatmağa qarar aldı, dep ayttı vatandaş aviatsiyası agentliginiñ müdir muavini Aziz Nabizoda Azattıknıñ tacik muarririyetine.
Soñki malümatqa köre, dünyada 79 biñden çoq insan koronavirusnen hastalandı, 2 500-den çoq kişi öldi.
