Kezlevde qırımtatar qorantası İbragimovlarnıñ evinde ve tükânında keçirilgen tintüvden soñ tutulğan Abdulla İbragimov memuriy maddege istinaden üç künge apiske alındı. Bu aqta «Qırım birdemligi» cemaat birleşmesi Qırım.Aqiqatqa bildirdi.
Böylece, advokatlar Kreml kontrolindeki Kezlev şeer mahkemesi İbragimovnı Rusiye Memuriy bozuvlar kodeksiniñ 20.3 maddesiniñ 1-inci qısmına istinaden («Federal qanunlarğa köre numayış etilmesi yasaqlanğan natsist atributları ya da timsallerini, ya da natsist atributları ya da timsallerine oşağan timsallerni, ya da ekstremist teşkilâtlarınıñ atributika ya da timsallerini, ya da diger artibut ya da timsallerni propaganda etüv ya da açıq numayış etüv») apiske aldı.
«Apiske alınmasınıñ sebebi VKontakte içtimaiy ağında İbragimovnıñ saifesinde derc etilgen Rusiye Federatsiyasında yasaqlanğan «Hizb ut-Tahrir» firqası timsalleriniñ resimleri oldı», – dep añlattı faaller.
Olarnıñ malümatına köre, imaye, İbragimov bu resimlerni derc etkende Ukrainada edi, anda ise bu teşkilât yasaqlanmağan, dep qayd etti. Advokatlar bildirme tizilgende yapılğan protsessual hatalarğa diqqat ayırdı.
«Mahkeme ise İbragimovnıñ bulunğan yeri müim degil, çünki qabaatlav taqdim etilgende paylaşuv saifesinde daa bar edi, dep añlattı. Kollegiyanıñ fikirince, bildirmede olğan yañlışlar «cinayet tasnifine tesir etmey», – dep qoştı «Qırım birdemligi».
Advokat Edem Semedlâyevniñ «Gratı» neşirine bildirgenine köre, Abdulla İbragimovnıñ bu paylaşuvı daa 2013 senesi olğan edi. İbragimov memuriy protokolda qayd etilgen resimlerni derc etkenini tanıdı, lâkin bu çoqtan oldı ve qanunlarnı bozmağa niyeti yoq edi, dep ayttı. Ukraina qanunlarına köre, bu timsaller ve islâm firqası yasaqlanmadı.
Daa evel berilgen malümatqa köre, Kezlevde Ali İbragimovnıñ evinde keçirilgen tintüv yekünlendi, eki büyük oğlu Mustafa ve Abdulla İbragimovlarnı Rusiye quvetçileri belli olmağan yerge alıp ketti.
İyülniñ 22-nde saba Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evini tintip başladı. Daa soñra Ali İbragimovnıñ evine acele yardım maşinası keldi.
Rusiye quvet müessiseleri vaziyetni açıq şekilde izaatlamay.
Qırım Muhtar Cumhuriyeti ve Aqyar prokuraturası Rusiye quvetçileriniñ Kezlevde 57 yaşında Ali İbragimov ve 27 yaşında oğlu Mustafa İbragimovnıñ evinde keçirgen tintüvleri sebebinden cinaiy tahqiqat başlatıldı, dep bildirdi.
Bundan evel Ukraina ombudsmanı Lüdmila Denisova halqara toplulıqnı Rusiye quvetçileriniñ yapqanlarına cevap bermesine çağırdı.
Qırımtatar Milliy Meclisiniñ reisi Refat Çubarov Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvini«qırımtatarlarnı ayrı qorquzuv şekli» ve «esas insan aqlarını ihmal etüv» dep adlandırdı.
