İyülniñ 22-nde saba Kezlevde Rusiye quvetçileri tintüv keçirmege kelgen Ali İbragimovnıñ evine acele yardım maşinası keldi. Bu aqta «Qırım birdemligi» cemaat birleşmesi Qırım.Aqiqatqa bildirdi.
«Qomşularınıñ aytqanına köre, evniñ penceresinden Aliniñ ömür arqadaşı Gülvira İbragimova baqtı. O, kelgenlerden yardım istep, acele yardım çağırmalarını rica etti. Saba 10:08-de evniñ yanında acele yardım keldi. Mustafa İbragimov (oğlu) qorantağa ait tükânğa alıp ketkenler, anda da tahqiqat tedbirleri başlandı», – dep ayttı faaller.
Olarnıñ malümatına köre, evde 9 insan yaşay, dördü – çağına yetmegen balalar.
Cumaaqşamı sabası faaller Kezlevde Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evinde «tahqiqat tedbirlerini» keçire, dep bildirdi.
Rusiye quvet müessiseleri vaziyetni izaatlamay.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
