Ukraina ombudsmanı Lüdmila Denisovanıñ fikirince, Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvi «İnsan aqlarını qoruv şartnamesiniñ 5-inci maddesini» boza. O, halqara toplulıqnı Rusiye quvetçileriniñ yapqanlarına cevap bermesine çağırdı.
«İşğalci memleket qırımtatarlarnı kene taqip etip qorquza. Qayd etem, Ukraina vatandaşlarınıñ evlerinde keçirilgen tintüvler halqara normalarğa zıt kelip, er bir insannıñ şahsiy tiyilmemezlik aqqını kefil etken insan aqları ve esas serbestligini qoruv şartnamesiniñ 5-inci maddesini ve Şartnameniñ 8-inci maddesini – şahsiy ve aile ayatına sayğı aqqını boza», – dep yazdı Denisova Facebook saifesinde.
Cumaaqşamı sabası faaller Kezlevde Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evinde «tahqiqat tedbirlerini» keçire, dep bildirdi.
Rusiye quvet müessiseleri vaziyetni izaatlamay.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
