Rusiye nezaretindeki Qırım akimiyeti iyün 30-ında Keriç köpründen yük poyezdleri yürip başlağanını haber ete. Qırıkmnıñ rusiyeli başı Sergey Aksönov, bunıñ neticesinde yarımadada fiyatlarnıñ tüşmesini bekley.
"Köpürniñ quveti künde 12 yük poyezdniñ keçmesine yetecek. Bu bir yılda 13 million tonna malnı taşımağa imkan berecek. Yük poyezdlerniñ yürmesi fiyatlarnıñ tüşmesine sebep olmalı", - yazdı Aksönov Facebookta.
O emin ki, yük poyezdlerniñ yürip başlaması yarımadanı qurucılıq mahsulatınen temin etecek.
Daa evel iyünniñ 30-ından soñ Keriç köpründen yük poyezdleriniñ yürmesini başlatacaq olğanları bildirile edi. Bundan evel ondan tek yolcu poyezdleri yüre edi.
Rusiyeniñ "Yujnaya" taşıyıcısı şirketi, aprel ayında Qırımda "Aqyar - Aqmescit - Kezlev" ekspress poyezdiniñ yürip başlaycağını ilân etken edi.
Martnıñ 7-sinde ilhaq etilgen Qırımnıñ Keriç şeerinden qomşu Rusiyeniñ Krasnodar ülkesiniñ Anapa şeerine elektrik poyezdni yiberdiler.
Dekabrniñ 23-ünde Rusiye prezidenti Vladimir Putin Keriç boğazından keçken köpründe poyetlerniñ yürmesini başladı.
Keriç köpründen keçken ilk 100 rusiye poyezdi 85 biñ yolcunı taşıdı.
QMC prokuraturası Keriç köpründen ilhaq etilgen Qırımğa Ukraina devlet sıñrından adamlarnıñ qanunusız keçirilmesi sebebinden cinaiy dava açtı.
