Ekinci Bağçasaray "Hizb ut-Tahrir davası"nıñ iştirakçisi, "Qırım birdemligi"niñ koordinatorı Server Mustafayevniñ advokatı Lilâ Gemeci, müşterisi sentâbr 13-ünden berli tutulğan №1 Krasnodar SİZOsınıñ kamera şaraitleri aqqında Qırım.Aqiqatqa aytıp berdi. Advokatnıñ malümatına köre, Mustafayevniñ suvğa daimiy çıqışı yoq ve o tutulğan kamerada ara-sıra kanalizatsiya borusı yırtılıp, töküle.
"O, çoqusı tek qala. Bu 4 kvadrat metrlik kameradır. Bu yerde töşek, suv dolabı, masa ve kenefke oşağan bir şey - töşemede teşik - yerleşe. Eki künden bir şu teşikten necaset püskürip çıqa ve bütün töşemege yayıla. Bunıñ içün o, öz şeylerini tabandan töşekke kötermege mecbur. Kenef saba bozulsa, onıñ aqşam tamir içün kele bileler", - aytıp berdi Gemeci.
Onıñ malümatına köre, kamerada üç parmaqlığı olğan küçük bir pencere bar, pencere tübünde - aşhaneniñ yemek qalıntıları obası.
"Neticede: pencereden - çürügen qalıntılar qoqusı, kamerada - bozulğan kanalizatsiyadan necaset qoqusı. Suvğa daimiy çıqış yoq. Kezintide olğanda suv peyda olsa - demek toldurıp yetiştirmediñ ve nevbetteki imkâniyetni bekleyceñ", - aytıp berdi advokat.
Bundan ğayrı, oña eki künde bir domuz etinden pişken aşnı bereler, onıñ içün o er kün aşamay.
"Eki künde bir domuz etini bereler, demek o eki künde bir aşay. SİZOnıñ nevbetçi qısmında maña añlattılar, Server "tranzitnik" (SİZOda etap vaqtında buluna - QA) olğanı içün, oña yollanmalar yiberilmey. O, Aqmescit SİZOsından yanına alğan erzaqnı bayağı vaqıt bölip aşay edi", - dey advokat.
Ukraina Yuqarı Radasınıñ insan aqları vekâletlisi Lüdmila Denisova, Bağçasaray "Hizb ut-Tahrir davası"nıñ iştirakçileriniñ şaraitlerini yahşılaştırmağa, rusiye akimiyetinden talap ete.
Ekinci Bağçasaray "Hizb ut-Tahrir davası"nıñ iştirakçileri Server Zekiryayev ve Memet Belâlovnı Rostov-na-Donu (Rusiye) şeeriniñ №1 SİZOsına etap ettiler.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Avgustta Şimaliy Kavkaz bölge arbiy mahkemesi, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq.
