Ukraina Yuqarı Radasınıñ insan aqları vekâletlisi Lüdmila Denisova, Bağçasaray "Hizb ut-Tahrir davası"nıñ iştirakçileriniñ şaraitlerini yahşılaştırmağa, rusiye akimiyetinden talap ete. Bunı o, tevqif etilgen adamlarnıñ soyları, advokatları ve uquq qotuyıcılarnen körüşüvden soñ içtimaiy ağlarda yazdı.
Denisova, bazı iştirakçilerni "stakanlar"da (avtozaklarğa pekitilgen qapalı küçük demir qafes), bazılarını ise mahsus poyezdde etap etkenlerini bildirdi. Onıñ malümatına köre, "avalanuv yoq edi, temiz ava ve kenefke çıqışlar yoq edi, bundan ğayrı, aş berilmey edi ve diniy merasimlerni keçirmek içün imkân berilmey edi".
"Ukraina vatandaşlarınıñ apiste tutulğan şaraiti aqqında malümat bar: mabüslerge eki künde bir domuz etinen pişirilgen aşlar berile, böylece, olar eki künde bir aşaylar. Rostovda apishanede vatandaşlarımız yarı mahsus blokta tutula, daimiy video közetüvi altında ve odada birer adam olıp. Krasnodar SİZOsında - ayrı odalarda ve mahsus blokta tutulalar, anda töşemeler çürük, etrafta kenefler ve kimerde söndürilip turğan suvuq suv. Bu etapta mabüslerge yollanmalarnı qabul etmeyler, onıñ içün kerekli şeylerni yibermege de çare yoq", - yazdı Denisova Facebookta.
Ukraina ombudsmeni haber etkeni kibi, tutulğan bütün Ukraina vatandaşlarınıñ sağlıq problemaları bar. Hususan, olarnıñ arasında saqat adam bar ve o mahsus tibbiy yardımğa muhtac.
Denisova, "Ukraina vatandaşlarınıñ aqlarını kütmek içün Rusiyeniñ insan aqları vekâletlisi Tatyana Moskalkovağa ve Rusiye prezidentniñ insan aqları şurasınıñ reisi Mihail Fedotovğa acele muracaat etkenini" bildirdi.
"Bundan ğayrı, destek etmek ricasınen halqara topluluqqa muracaat etem", - qoştı Denisova.
Ekinci Bağçasaray "Hizb ut-Tahrir davası"nıñ iştirakçileri Server Zekiryayev ve Memet Belâlovnı Rostov-na-Donu (Rusiye) şeeriniñ №1 SİZOsına etap ettiler.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Avgustta Şimaliy Kavkaz bölge arbiy mahkemesi, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq.
