Bazarertesi künü, mayısnıñ 18-nde, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibaret qırımtatar halqı ile birdemlik aftası – «Bir acı. Bir tarih» – çerçivesinde içtimaiy ağlarda qırımtatarlarğa qoltutuv flashmobı da başlana.
Bu kampaniyanıñ teşebbüsçileri – Ukraina PENi, «Qırım evi», Vatandaş serbestlikleri merkezi, KrımSOS ve Qırım.Aqiqat.
Qayd etilgenine köre, flashmob iştirakçilerini qırımtatar tamğasınen – basılğan ya da qolnen sızılğan – foto yapıp, içtimaiy ağlarda #QırımtatarSurgunu ve #RememberGenocideMay18 heşteglerinen derc etmelerine çağıralar. Fotoresimlerden ğayrı, iştirakçiler qırımtatar sürgünligi aqqında ne vaqıt eşitkenlerini ya da qırımtatarlarnıñ tarihı ya da medeniyetinen ilk sefer ne vaqıt tanışqanlarını tarif ete bile.
Bazarertesi künü, mayısnıñ 18-nde, sovetler rejiminiñ qırımtatarlarnı tarihiy vatanları Qırımdan sürgün etkeniniñ 76-ncı yılı tola. Ukraina ve dünyada Qırımtatar halqınıñ sürgünlik ve genotsid qurbanları añılmaqta.
Mayısnıñ 18-nde bir sıra telekanal «Ukrainanıñ online mektebi» leyhası çerçivesinde orta ve üyken sınıflarnıñ talebeleri içün Qırımtatar halqı genotsidiniñ qurbanları hatırasına mahsus ders yayınlaycaq. İştirak etecekler arasında qırımtatar asıllı ukrainalı yırcı Jamala ve qırımtatar asıllı ukrainalı rejissör Nariman Aliyev barlar.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Qırımtatar faali, Qırımtatar Milliy Meclisiniñ reis muavini Nariman Celâl yarımadadaki semetdeşlerine qırımtatar halqı genotsidiniñ yılına – mayısnıñ 18-ne – ev ve balkonlarda qara şeritli qırımtatar bayraqlarını asmağa teklif ete.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
