Başqırtistandaki Rusiye koloniyasında tutulğan Qırımdaki «Hizb ut-Tahrir davasınıñ» mabüsi Teymur Abdullayevniñ anası Dilâra Abdullayeva noyabrniñ 14-nde oğlunıñ sağlıq vaziyeti sebebinden Cezalarnı yerine ketirüv federal hızmetine, Rusiye Baş prokuraturasına, koloniya reberligine, Rusiye ombudsmanı Tatyana Moskalkovağa bergen muracaatını derc etti.
«2 nomeralı koloniyanıñ ceza izolâtorındaki mağazlarda arasız tutıp, oğlumnıñ sağlığını yoq etkenlerini ve ayatı telükede olğanını şikâyet ettim. Ceza izolâtorında oğlum COVID-19 keçirdi, yürek-damar sistemasına ciddiy seviyede ağırlaştı ve gipertonik kriz keçirdi. Oğlum koronavirustan tedaviylenmedi, bir reabilitatsiya da körmedi», – dep aytıla muracaatta.
Qadınnıñ malümatına köre, oğlu koloniyağa kelgeninden berli ceza izolâtorında – 2020 senesi baarden berli tutula.
«Oğlum ne içün taqip etile bilmeyim. Koloniyağa kelgeninden berli, 2020 senesi martnıñ 10-ndan berli ve bugünge qadar böyle basqı ve ceza izolâtorında tutuv devam ete, oğlum ceza izolâtorınıñ mağazında tutula, insan böyle basqığa dayanamay. Bu vaziyet mabüslerge insaniyetsiz ve itibarını aşalağan munasebet olğanını isbatlay, aqları ciddiy seviyede bozula. İşbirligi yapmağa razı olmağanlarğa bunı yapıp «çürüteler». Oğlum Teymur Abdullayevge qarşı cinayet ve terror – Rusiye koloniyalarında mabüslerniñ aqları ciddiy seviyede bozula. Oğlumnıñ ayatını qurtarmaq kerek!», – dep aytıla muracaatta.
Rusiye akimiyeti, Cezalarnı yerine ketirüv federal hızmeti ve Rusiye insan aqları vekâletlisi bu muracaatqa daa cevap bermediler.
Oktâbrniñ soñunda berilgen malümatqa köre, Teymur Abdullayevniñ Rusiye koloniyasındaki ceza izolâtorında qaluv müddeti daa 12 künge uzatıldı.
Teymur Abdullayev bir yıldan ziyade Rusiyeniñ Salavat şeerindeki koloniyanıñ ceza izolâtorlarında tutuldı. Ceza izolâtorınıñ müdriyetiniñ versiyasına köre, o, tutuv rejimini muntazam tarzda bozğan. İyünniñ başında, advokatları ve tuvğanlarınıñ ğayreti sayesinde onı ŞİZO-dan çıqardılar.
Dilâra Abdullayeva iyülniñ 28-nde Kyivde Ukraina prezidentiniñ ofisi ögünde bir kişilik narazılıq aktsiyasını ötkerdi. O, başlıqlardan oğullarınıñ – Ukraina vatandaşlarınıñ azat etilmesi meselesinden ne iş körgenleri aqqında malümat bermege talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
