Rusiye kontrolindeki Qırım Yuqarı mahkemesi istinaf diñlevlerinde Kezlev şeer mahkemesiniñ Abdulla İbragimovnı 2013 senesi «VKontakte» içtimaiy ağında Rusiyede yasaqlanğan «Hizb ut-Tahrir» teşkilâtınıñ timsallerini paylaşqanı içün üç künge apiske almaq qararını qanunğa uyğun dep tanıdı.
«Qırım birdemligi» advokat Rustem Kâmilevniñ malümatına esaslanıp bildirgenine köre, qabaatlanğan kişi ve advokat oturışuvda iştirak etip yetiştirmedi, qarar 15 daqqada seslendirildi.
«Oña qarşı sımarlanğan bir dava olğanını tüşünemiz. Deliller çoq edi: em istinaf şikâyetinde, em birinci instantsiya mahkeme oturışuvında. Faqat buña qulaq asılmadı, ve bugün beklengen bir qarar aldıq. Ebet, bu qararnı teslim alğan soñ ileri şikâyet etecekmiz. Bu dava Avropa insan aqları mahkemesine ketecek ve esas imaye aqlarına riayet etilmegeni aqqında aytqan davalarımıznen bir olacaq», – dedi Rustem Kâmilev. O, İbragimovğa qırımtatarcadan rusçağa çevirecek terciman berilmedi, dep hatırlattı.
2021 senesi iyülniñ 22-nde Kezlevde qırımtatarlar İbragimovlarnıñ evinde ve qorantalarına ait tükânda keçirilgen tintüvlerden soñ, Abdulla İbragimov memuriy maddege istinaden üç künge apiske alındı. Bunıñ sebebi «VKontakte» içtimaiy ağında İbragimovnıñ saifesinde derc etilgen Rusiyede yasaqlanğan «Hizb ut-Tahrir» teşkilâtınıñ timsalleri oldı.
Daa evel berilgen malümatqa köre, Kezlevde Ali İbragimovnıñ evinde keçirilgen tintüv yekünlendi, eki büyük oğlu Mustafa ve Abdulla İbragimovlarnı Rusiye quvetçileri belli olmağan yerge alıp ketti.
İyülniñ 22-nde saba Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evini tintip başladı. Daa soñra Ali İbragimovnıñ evine acele yardım maşinası keldi.
Rusiye quvet müessiseleri vaziyetni açıq şekilde izaatlamay.
Qırım Muhtar Cumhuriyeti ve Aqyar prokuraturası Rusiye quvetçileriniñ Kezlevde 57 yaşında Ali İbragimov ve 27 yaşında oğlu Mustafa İbragimovnıñ evinde keçirgen tintüvleri sebebinden cinaiy tahqiqat başlatıldı, dep bildirdi.
Bundan evel Ukraina ombudsmanı Lüdmila Denisova halqara toplulıqnı Rusiye quvetçileriniñ yapqanlarına cevap bermesine çağırdı.
Qırımtatar Milliy Meclisiniñ reisi Refat Çubarov Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvini«qırımtatarlarnı ayrı qorquzuv şekli» ve «esas insan aqlarını ihmal etüv» dep adlandırdı.
