Rusiyeniñ Cenübiy okrugınıñ arbiy mahkemesi «Hizb ut-Tahrir davasınıñ» mabüsi Azamat Eyupovnıñ apis müddetini 6 ayğa uzattı. Bu aqta «Qırım birdemligi» cemaat birleşmesi advokat Emil Kurbedinovnıñ malümatına esaslanıp haber ete.
Advokatnıñ aytqanına köre, imaye Ukraina vatandaşı olğan mabüske nisbeten IV Jeneva şartnamesi qullanılsın dep israr etti. Advokatnıñ aytqanına köre, Rusiye «Qırımda siyasiy olmağan mahkemelerni yapmalı, halqara vesiqağa binaen, bu cinaiy dava onıñ maddelerine köre baqılmalı».
İmaye qırımtatarcadan tercime etecek tercimannı bermege talap etti, faqat qabaatlav imaye muracaatını «qanunsız» dep adlandırdı.
Mahkeme bütün muracaatlarnı baqıp, qabaatlav tarafını tuttı ve bütün muracaatlarnı red etti.
İmayeniñ sıñırlav tedbirini deñiştirüv ve tercimannı berüv arizaları red etildi.
Azamat Eyupovnıñ ilk açıq mahkeme oturışuvı iyülniñ 22-nde Cenübiy okrugınıñ arbiy mahkemesinde olacaq.
Daa evel berilgen malümatqa köre, Vlasihadaki (Rusiye) İstinaf arbiy mahkemesi Cenübiy okrugınıñ arbiy mahkemesiniñ Aqmescitteki ekinci «Hizb ut-Tahrir davasınıñ» beş mabüsiniñ SİZOda tutuv olaraq saylanğan sıñırlav tedbiriniñ uzatılması qararını deñiştirmedi.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
