«Qırım birdemligi» birleşmesiniñ faalleri Qırım.Aqiqatqa bildirgenine köre, fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ evlerine keldi.
İçki rayonında Mamamadinov Abdulbori, Qarasuvbazarda Eyupov Azamatov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirile.
«Ernest İbragimov 10 yıldan çoq «Salaçıq» karavan-sarayında aşçı olıp çalıştı ve «Qırım balalığı» siyasiy mabüslerniñ balaları içün leyha faali ola. 2017 senesi oña qarşı memuriy dava açılğan edi. FSB bildirgenine köre, tintüv mahsus hızmetlerniñ hadimleri tarafından cinaiy dava çerçivesinde keçirile», – dep bildire faaller.
«Qırım birdemligi» malümatına köre, Azamat Eyupov 2019 senesi iyül ayında Moskvanıñ Qızıl meydanında qırımtatarlarnıñ narazılıq aktsiyasında iştirak etti ve qırımlı musulmanlarğa qarşı davalar boyunca açıq mahkeme oturışuvlarında er vaqıt bara.
«Mahamadinov Abdulboriniñ 7, 5 ve 2 yaşında üç çağına yetmegen balası bar. İbragimov Ernest dört balasını baqa, beşinci balaları doğacaq», – dep qoştı faaller.
Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Haber etilgenine köre, tutulğan qırımlılarğa advokatlar Siyar Paniç, Lilâ Gemeci, Yunus Refat, Marlen Halikov, Emil Kurbedinov ve Taras Omelçenko uquqiy yardım kösterecek.
Rusiye quvet müessiseleri Qırımda fevralniñ 17-nde keçirilgen tintüvlerni açıq şekilde izaatlamay.
Rusiye FSBsiniñ malümatına köre, Qırımda ve Tataristanda mahsus hızmetlerniñ hadimleri bir gruppa insanlarnı tutıp, Rusiyede yasaqlanğan terror teşkilâtına para bergeninde qabaatlay. Bunıñnen beraber, aynı şübheler esasında Rusiye kontrolindeki Aqmescit mahkemesi tarafından bir qoranta apiske alındı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
