Mayısnıñ 18-nde Hersonda karantin şaraitlerinde telükesizlik tedbirlerine riayet etip, qırımtatar sürgünliginiñ qurbanları añıldı. İnsanlar hatıra taşına çeçek ketirip dua etti, dep bildire Qırım.Aqiqat mühbiri.
Hersonda qırımtatarlarğa qol tutmaq içün şeer akimiyeti ve milliy azlıq vekilleri keldi.
«Tedbir 9:00-dan 12:00-ğa qadar tertip etildi, insanlar bir yerde toplaşmasın ve er kes kelip elâk olğanlarnı añsın istedik. Şunıñ içün vaqıt belgilendi. İnsanlar kelip, dua oquycaq ve çeçek qoyacaqlar. Bu facia tesir etmegen iç bir qırımtatarı yoqtır. Tünevin ev arhivlerinde babamnıñ yazısını taptım. O adise-vaqialarnı «canlandırdım». Qorantada 12 insandan tek ekisi sağ qalğanını tarif etken edi», – dep bildirdi jurnalistlerge Herson şeer meclisiniñ reisi İbragim Suleymanov.
Ukraina prezidenti Volodımır Zelenskıy qırımtatar halqı genotsidiniñ yılında Rusiye işğal etken Qırım yarımadasınıñ Ukraina kontroline, qırımtatarlarnıñ ise tuvğan evlerine qaytacağına ümüt etkenini bildirdi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar. Tedbir Rusiye quvetçileriniñ nezareti altında keçti.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
