Harkivda saba Rusiye ücümi neticesinde elâk olğanlarnıñ sayısı arttı.
Harkiv vilâyetiniñ arbiy memuriyetiniñ yolbaşçısı Oleğ Sinegubovnıñ bildirgenine köre, qurtarıcılar yıqılğan çoq qatlı binanıñ viraneleri altında doquz yaşındaki qızçıqnıñ cesedini taptı.
Ukrayina İç işler nazirliginde qayd ettiler ki, al-azırda sekiz elâk olğan ve 60 yaralanğan (o cümleden altı bala) aqqında belli.
İşler devam ete, dep qoştı Ukraina İç işler nazirligi.
Saat 04:00 ve 07:20 Rusiye ordusı Harkivniñ Kıyiv ve Saltov rayonlarına bir qaç kere darbe endirdi. Akimiyetniñ ilk malümatına köre, X-22 raketaları ile ücüm etildi. Harkivniñ Kıyiv rayonında Rusiye ordusı çoq qatlı evge ücüm etti - kirişleri yoq etildi. Yıqıntılarnı temizlev devam ete.
Rusiye ordusı yanvarniñ 23-nde saba Ukrayinağa qarşı silâlı ücüm etti. Zarar körgenler ve yaralanğanlar aqqında Kıyiv ve vilâyetinde, Dnipropetrovsk vilâyetiniñ Harkiv ve Pavlograd şeerlerinde belli.
Ukrayina Arbiy-deñiz quvetleriniñ ava quvetleri bildirdi ki, Ukrayinağa yapılğan saba raketa ücüminde Rusiye ordusı 41 ava ücümini açtı, ukrayin arbiyleri 21 raketanı urıp tüşürdi.
Delillerge baqmadan, Moskva, Rusiye ücümleriniñ maqsadı Ukrayinanıñ arbiy infrastrukturası olğanını iddia ete ve vatandaş ealisine ücüm etkenini red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
