Advokat Nikolay Polozov, Anğara (Perevalnoye) köyü yaqınlarında gaz borusında "diversiya yapqanınen" şübeli sayılğan Aziz ve Asan Ahtemovlar itiraf etip, qabaatını tanığanları ile bağlı Rusiye FSB-siniñ videosını tefsir ettip, Rusiye tahqiqatı bu dava ile alâqlı sayğan faal Nariman Celâlnıñ mudafaasınıñ mevamı deñişmeycegini bildirdi.
«Nariman Celâlnıñ mudafaası ile bağlı mevam deñişmeycek. Tünevin mahkeme vaqtında Nariman Celâl açıq şekilde bildirdi ki, taqip etilmesi sırf siyasiy sebeplerden işğalniñ tanılmaması ile bağlı onıñ açıq, içtimaiy ve siyasiy mevamı içün, Rusiye akimiyetini quturtqan "qırım platforması" tesis sammitinde iştirak etmesi içün. İşğalniñ 8 yılı devamında quvulmağanını ya da tevqif etilmegenini, Qırımda qalğan qırımtatar lirdelerinden biri olganını köz ögüne alsaq, o da buña oğratılacağı tek zaman meselesi edi», – dedi Polozov.
Onıñ fikrince, Celâlnıñ diversiyağa alâqası barmı, yoqmı dep ciddiy şekilde fikir etmek imkânsızdır, çünki bütün bular fantastika alemindendir.
«O, işğal etilgen topraqta öz halqınıñ aqlarını mudafaa etken qırımtatarlarnıñ liderlerinden biri olğanı içün taqip etile», – dedi advokat.
Sentâbrniñ 7-nde TASS Rusiye malümat agentilgi bildirgenine köre, Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanınen şübeli sayılğanlar suçunı itiraf etkenler. FSB yayınlağan videoda, eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp bergenler.
FSB-niñ malümatına köre, diversiyanı Ukraina Mudafaa nazirliginiñ Baş istihbarat idaresi teşkil etken.
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Kreml kontrolindeki Aqmescitteki Kiyev rayon mahkemesi raatlıq künleri tutulğan qırımtatar siyasetçisi ve faali Nariman Celâlnı eki ayğa, noyabrniñ 4-ne qadar, apiske aldı.
Qırımda sentâbrniñ 3-nde ve 4-nde tintüvler vaqtında tutulğan dört qırımtatarı tutuldı. Eki doğmuş ağa-qardaş Aziz ve Asan Ahtemovlar eki ayğa, noyabrniñ 4-ne qadar, apiske alındı.
Aziz Ahtemovnıñ babası Eskender 10 künge apiske alındı. Asan Ahtemovnıñ qardaşı Arsen 15 künge apiske alındı. Eskender ve Arsen «politsiyağa itaat etmegeni» içün nezaret altına alındı. Ekisi de sentâbrniñ 4-nde Qırımdaki FSB binası ögünde tutuldı.
Advokat Ayder Azamatovnıñ bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı – Nariman Celâl, Aziz Ahtemov, Asan Ahtemov, Eldar Odamanov ve Şevket Useinovnı – Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Rusiye quvet müessiseleri raatlıq künleri Qırımda insanlarnıñ tutuluvına dair malümatnı resmiy şekilde alâ daa tefsir etmedi. Qırımnıñ Rusiye akimiyetine yaqın «Krıminform» saytı sentâbrniñ 5-nde uquq qoruyıcı organlardaki menbalarğa esaslanıp, «sentâbrniñ 4-nde cinaiy dava çerçivesinde operativ-tahqiqat tedbirleri keçirildi. Beş İnsan tutuldı, olarnıñ arasında Nariman Celâl da bar, sıñırlav tedbirleri meselesi baqıla», dep bildirdi.
