İtaliya Avropanıñ eñ çoq eziyet çekken ülkesi olaraq qala, lâkin epidemiya malümatları hastalıqnıñ yayılma zirvesi yaqında keçecegine ümüt bere, yaza "Amerika Sesi".
Bazarertesi künü İtaliyada yañı 1648 hasta adam tayinlendi, bu evelki künge köre - 3815 adise - eki kere azcadır.
Amma aynı zamanda skeptik tahminler de bar, olarğa köre, yañı yuqma adiselerniñ azca olması daa az analiz yapılmasınen bağlıdır.
İtaliyada koronavirustan ölgenlerniñ üçten birisinden çoqu qayd etildi - 11 591 adise.
Artıq üç afta devamında İtaliyada sert karantin devam ete: tükânlarnıñ çoqusı qapalı, adamlar yalıñız fevqulâde allarğa oğrasalar evlerinden çıqmasına izin berile.
İtaliya ükümeti dünya karantinini eñ azından Pasha bayramınace (aprelniñ 12-si) uzattı, amma soñ tarihi daa belli degil.
Avropada koronavirus
Koronavirusnıñ ciddiy tesiri olğan başqa bir memleket, İspaniyada, ükümet daa eki afta müddetinde sert karantin qaideleriniñ uzatılmasını ilân etti, ve infektsiya yayılmasınıñ yavaşlanğanını bildirdi.
İspaniyanıñ tış işler naziri Arancha González, virusnıñ yayılması cedvelinde çızıq daa ufqiy alğa kelgenini ayttı.
Коронавирус в Праге: опустевшие улицы и люди в масках (фотогалерея)
Almaniya şimdigece İtaliya ve İspaniyadaki kibi epidemiyadan qutuldı, amma bazarertesi künü anda 4750 hasta qayd etildi, böylece hastalarnıñ umumiy sayısı 57 000 oldı.
Almaniyada, başqa memleketlerge nisbeten, koronavirusnen bağlı azca ölüm bar - 541 adise.
Büyük Britaniyada, ükümetniñ baş ilmiy mesleatçısınıñ aytqanına köre, bir aftalıq karantinden soñ, sıñırlayıcı tedbirlerniñ epidemiya tarqalmasınıñ suratını azlaştırğanını ilk alâmetleri körünip başlağan.
Londonda bazarertesi künü 1408 britaniyalı ölgenini haber ettiler.
Macaristan ükümeti koronavirus epidemiyası sebebinden daa keñiş salâhiyetlerni aldı ve baş nazir Viktor Orbannıñ kabineti qararlarnı çıqara bile.
Macaristanda, jurnalistlerniñ koronavirus epidemiyasınen bağlı yayınları belli talaplarğa uymasa, olar apis etile bilgeni raatsızlay.
Пандемия в Швеции: работающие магазины, рестораны и бары (фотогалерея)
Moskovada 12 millionda ziyade paytaht sakini içün sert karantinni ilân ettiler.
Avstriyada bazarertesi künü ükümet, tükânlarda mıtlaq maska taqmaq kerek olğanını ilân etti, amma Dünya Sağlıq Teşkilâtınıñ tevsiyelerine köre, tibbiy maskalar, ilk-evelâ hastalarğa ve olarnı baqqanlarğa kerek.
"Eali tarafından tibbiy maskalarnıñ kütleviy şekilde taşıması nasıldır müsbet eticelerni bergenine dair iç bir temel yoq. Aslında, maskalarnı keregi kibi taqmağanda, bunıñ aksinesini tahmin etmege yer bar", - dedi DST-nıñ baş vekili Mayk Rayan.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
