Rusiye akimiyeti kontrolindeki Qırım Yuqarı mahkemesi sentâbrniñ 16-nda sentâbrniñ 4-nde Aqmemscitte FSB binası ögünde tutulğan qırımtatar faali Eskender Ahtemovnıñ memuriy davası boyunca birinci instantsiya mahkemesiniñ qararını deñiştirmedi.
Bu aqta Qırım.Aqiqat mühbiri advokat Rustem Kâmilevniñ malümatına esaslanıp bildirdi.
Onıñ malümatına köre, qadı Vladimir Agin istinaf şikâyetini red etti, birinci instantsiya mahkemesiniñ 10 künlik memuriy apis qararı deñiştirilmedi.
Eskender Ahtemov – sentâbrniñ 4-nde tutulğan gaz borusında «diversiya davasınıñ» mabüsi Aziz Ahtemovnıñ babasıdır. Eskender Ahtemov azatlıqqa çıqtı. Oğlu ise apiste qala, onı Anğara köyünde «gaz borusında diversiya yapqanından» şübheli sayalar. O, işkencege oğratılğanını advokatına bildirdi.
Eskender Ahtemov sentâbrniñ 4-nde Aqmescitteki Rusiye FSBsiniñ idare binası ögünde diger faallernen beraber tutuldı. O künü Rusiye quvetçileri tintüv keçirip, qırımtatar faallerini tuttı. Eskender Ahtemov 10 künge apiske alındı.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Sentâbrniñ 16-nda Rusiye kontrolindeki Aqmescitniñ Kiyev rayon mahkemesiniñ qadısı Mihail Belousov sentâbrniñ 16-nda Qırımtatar Milliy Qurultayınıñ Merkeziy saylav komissiyasınıñ yolbaşçısı, faal Zair Smedlânı «yüksek seviyeli azırlıq rejiminiñ sıñırlavlarını bozğanında» qabaatlap, oña azamiy ceza berdi – 30 biñ ruble para cezası.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Aralarında qırımtatar siyasetçisi ve faali Nariman Celâl bar. FSB malümatına köre, qırımtatarlar «bu yıl avgustnıñ 23-nde Qırımdaki gaz borusında diversiya yapqanları şübhesinen tutuldı. Rusiye müessisesi, tutulğanlar qabaatını itiraf etti, dep bildirdi». Bu malümatqa köre, «FSB tarqatqan sorğu videosında eki erkek kimden talimat alğanını ve Anğara köyünde gaz borusını nasıl patlatqanlarını tafsilâtlâca tarif etti».
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Sentâbrniñ 6-nda Qırımda tutulğan dört kişi apiske alındı. Üç doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Ağa-qardaş Ahtemovlar tutulğanda FSB tarafından işkencege oğratılğanını bildirdi. Rusiye quvetçileri bu malümatnı açıq şekilde tefsir etmey. Qırım.Aqiqat, apiske alınğan qırımtatar faallerine qarşı FSB tarafından yapılğan işkencelernen bağlı informatsion muracaatnı FSBge yolladı.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
